Un dieet cu ta inclui azeta di oleifi extra virgen, por preserva memoria y yuda preveni e enfermedad di Alzheimer, un estudio realisa pa cientificonan di e facultad di Medicina di Universidad Temple a sigura, segun Efe.
E investigacion a mustra cu e consumo di e producto aki a reduci den ratonnan e formacion di proteina beta-amiloide y di bolanan neurofibrilar, dos indicador tipico di enfermedad.
Nos a haci e estudio aki pasobra nos ta sigui e literatura cu a mustra cu hende cu ta biba den e zona di mar Mediteraneo tin un menor incidencia di enfermedadnan cardiovascular y di enferme3dad di Alzheimer,” Domenico Pratico a bisa, kende ta un di e investigadonan. “Hendenan di e zona aki ta consumi diariamente azeta di oleifi extra virgen,” el a bisa.
Pa haci e investigacion aki, cientificonan a traha cu ratonnan cu ta reproduci tur e aspectonan di e enfermedad. “Ora e animalnan aki envehece nan ta desaroya problemanan di memoria y di apredisahe,” Pratico a splica.
E investigadornan a traha cu dos grupo di animal, uno cu tabata come e dieet normal di un raton y otro cu tambe a ricibi azeta di oleifi den un cantidad comparabel na loke un persona lo consumi.
“Nos a cuminsa ora cu nan tabata tin seis luna di bida, un momento cu nan no tin enfermedad ainda. Nos a sigui te cu nan a alcansa 12 luna, cu ta ekivale na 65 aña den sernan humano,” Pratico a relata.
Na prome luga, a nota cu e ratonnan cu a consumi azeta di oleifi, tabata tin un estado di su memoria te cu 40% miho compara cu esunnan di e otro grupo. Den e caso di aprendisahe di tarea, a observa cu loke a consumi e producto tabata mas rapido den siña y por recorda e detayenan di e tareanan, algo cu e otro grupo no por haci.
E paso siguiente tabata pa observa e celebro di e ratonnan, pa sa con azeta di olijfi a logra e cambio. “Nos a cuminsa busca e patologia clasico cu por wordo haya den e enfermedad di Alzheimer. Nos ta busca proteina beta-amiloide y bolanan neurofibrilares,” Pratico a puntualisa.
Asina a comproba cu e animalnan cu a consumi e azeta tabata presenta “un drastico reduccion den e cantidad” di e tenebrosonan indicador y su celebro tabata “mas limpi.”
“E azeta di oleifi extra virgen, como elemento natural, por wordo uza pa activa e mecanismo di autofagia,” Pratico a afirma, den referencia na e proceso pa loke e celnan ta “recicla” e toxina y desechonan interno. El a agrega cu “e autofagia ta wordo restringi den e enfermedad di Alzheier y pa esey e ta hopi emocionante,” el a agrega.
Fuente: www.eluniversal.com