Hues a cuminsa bisando cu tabata mama di e victima, D.B. cu a entrega denuncia contra di O.J., pa a tene relacion sexual cu su yiu muhe menor di edad. Aunke cu e relacion tabata di mutuo acuerdo, e solo hecho cu J. a tene relacion cu un menor di edad, ya caba ta un hecho castigabel pa cual mester wordo castiga.
Segun J., e no tabata sa cu D. tabata menor di edad. Nunca e por a pensa cu den un bar e lo haya un persona asina jong.
Hues a puntra O.J. na ki momento e la haya sa cu D.B. tabata tin solamente 14 aña. Riba esaki J. a bisa cu tabata e di dos biaha cu nan a topa cu otro, cu D.B. a bisa J. cu ta 14 aña so e tin.
Aki Hues a sigui bisa cu e ta haya cu J. ta duna declaracion contradictorio, riba cual O.J. a bisa cu e no ta inventando niun storia.
Simplemente cu e no por corda tur cos. Esaki ta locual el a declara tambe na Recherche ora di a duna su declaracion. E no tabata na altura cu B. tabata menor di edad ora cu el a drumi cun’e. Pa Hues, e caso ta bira aun mas dificil pa motibo cu J. no solamente a tene relacion cu un menor, sino cu e relacion tabata uno sin proteccion. Y e ta haya esey un falta di respet.
J. a splica Hues cu e no ta sali bay toca y busca menornan di edad pa drumi cu nan. Si e tabata kier a haci esey, lo el a bay haci esaki na scolnan, na manera di bisa.
E sa cu e la a haci algo malo, pa cual e ta arepenti. J. a mustra hues tambe ariba e hecho cu el a haya un diferencia di opinion cu tata di D.B. E la ripara cu algo no tabata klop, na e manera con e tata tabata papia cun’e. J. a sigui bisa cu el a pensa di caba e relacion na un manera suave door di aleha poco poco ya cu e tabata tin miedo pa represalia. Si e tabata sa cu D.B. tabata menor di edad, e lo no a ni balia cun’e y mucho menos sali cun’e.
Ariba esaki Fiscal tabata di opinion cu casonan asina tin e pueblo di Aruba dividi, caminda cu homber nan ya di edad, ta tene relacion cu menornan di edad, aunke den e caso aki e tabata ta mutuo acuerdo. Pero ta tene cuenta cu e e acusado no tin strafblad, y ta sigui conseho di Reclassering. Fiscal a bisa tambe cu el a discuti e caso cu diferente fiscal y por lo tanto a yega na e decision unda ta pidi 18 luna di prizon, di cual 6 ta condicional kitando e tempo cu el a pasa caba den detencion preventivo, cu’ n periodo di prueba di 2 aña.
Abogado mr. Chris Lejuez den su betoog a splica cu en berdad, su cliente a tene relaciom sexual cu’n menor di edad, aunke cu esaki tabata di mutuo acuerdo. El a sigui bisa cu J. a topa cu B. den un nightclub. Y e victima no a duna niun indice di cu e tabata asina jong. Es mas, D.B. tabata den e luga hunto cu su mayornan. Nunca antes e no tabata den contacto cu husticia. E ta tata di tres yiu, y semper e tabata tin un bon relacion cu e hubentud di Aruba. Abogado mr. Chris Lejeuz a pidi hues pa duna J. e mesun castigo cu a duna R.Q.T. , cual tabata di 12 luna.
Por ultimo, J. a hiba palabra y a pidi disculpa na mayornan di D.B., tambe na su mayornan, su rumannan, su famia completo, su amistadnan. E no ta un persona asina. E ta bay di acuerdo pa bay bou di Reclassering pa asina un caso asina no tuma luga mas.
Hues a cera tratamento di e caso y a bisa di lo dicta sentencia aki 3 siman, dia 30 di Maart pa 8.15 di mainta