Por lo menos 37 persona, entre nan 6 mucha, a fayece dialuna ora cu un avion di carga Turco a cay den un zona pobla. E accidente a sosode na momento cu e tabata purba di ateriza na e aeropuerto di e capital Biskek, na Kirguistan. Segun autoridadnan, e accidente ta debi na un posibel eror di e piloot.
E avion Boeing-747 di e compania ACT Airlines cu tabata curbi e ruta entre Hong Kong y Istambyl via Biskek, a cay den e localidad di Dacha Suu, cerca di e aeropuerto di Manas, poco despues di 7 ‘or di mainta, ora local.
Segun e ministerio di Salud, mayoria di e victimanan ta habitantenan di e localidad. Den e victimanan tabata tin seis mucha y cuatro piloot.
Oranan despues, un parti di e rabio di e avion tabata ariba e dak di un cas, completamente destrui mientras cu otro parti di e avion tabata tira den e cayanan di e pueblo, yena cu auto destrui y matanan kima.
E avion a cay riba casnan y famianan completo a muri den e accidente. Nada no a resta di e casnan, e hendenan a muri hunto cu nan yiunan. Mayoria di nan tabata na soño.
E restonan di e avion a daña por lo menos 43 vivienda, di cual 15 a keda totalmente destrui segun autoridadnan cu a cuminsa cu un operacion di rescate cu varios ekipo di socorrista, bombero y dokternan. Un di e posibel causa di e tragedia por ta condicionnan climatologico, ya cu e e visibilidad tabata hopi abao, debi na neblina.
Presidente di Kirguistan, Almazbek Atambaiev, a expresa su condolencianan na famia di e victimanan y a duna ordo pa conduci un investigacion pa haya sa cu exactitud e motibo di e tragedia. Tambe el a decreta un dia di duelo nacional pa diamars.