RUSIA – E ministerio di defensa di Rusia a informa cu den e avion Tu-154 cu a cay den e awanan di Lama Preto (Black Sea), ora cu e tabata dirigi pa Siria, tabata tin 64 integrante di e coro y conhunto di dansa Alexandrov, di e Ehercito Ruso.
E artistanan tabata bay pa participa den e festividadnan di aña nobo den e base aereo Sirio di Jmeimim, unda rusia tin desplega un agrupacion di avionnan di guera.
“Ami tambe mester a bula pa Siria, pero pa algun dia mi yiu muhe a enferma y mi a pidi algun dia liber pa mi atende,” Serguei Jlopnikov, integrante di e afamado colectivo artistico militar, a bisa e agencia Interfax.
El a agrega cu den e avion tabata tin siguramente solamente miembronan di e coro y di e conhunto di dansa, pasobra e presentacion na Siria no a contempla e participacion di e orkesta.
Ademas di e artistanan di Alexandrov, tabata biaha militarnan Sirio, nuebe periodista y e presidente di e fundacion “Ayudo Husto,” dokter Elizaveta Glinka, un conocido filantropo Ruso cu a compaña un carga humanitario destina na un hospital Sirio.
Fuente: NTN24