BUENOS AIRES, Argentina – E avion cu a cay ayera nochi na Colombia, caminda cu e club Brasileño Chapecoense tabata biaha aden y cu a costa bida di 75 persona, ta e mesun cu a traslada 18 dia pasa e seleccion Argentino for di di Belo Horizonte, Brasil pa Buenos Aires, depsues di a hunga un partido pa e eliminatorionan pa Rusia 2018.
En concreto, e delegacion di e Albiceleste, cu tin como capitan Lionel Messi, a biaha pa ultiom biaha den e avion aki di e aerolinea Lamia, cu matricula CP2933, dia 11 di November despues di e derota 3-0 contra e seleccion Brasileño.
Asina e website di estadisticanan y informacion aeronautico “Vuelos y Spotters” a publica riba su cuenta di Twitter dia 10 di November ultimo.
E avion a wordo gehuur pa e Club Brasileño pa e ta e prome final di un torneo internacional den su di 43 aña di historia contra Atletico Nacional Colombiano.
Respecto e avion eynan, fuentenan di e Asociacion di Futbol Argentino (AFA) cu a uz’e, a reconoce, segun nan a publica diamars den e corant Clarin, den su edicion digital, cu tabata “hopi chikito y hopi precario”, y cu nan a keha pasobra “e no tabata na altura di e seleccion.”
“E tabata move hopi, tabata tin desordo tur caminda y e problemanan di espacio tabata evidente, tanto cu tabata inconveniente pa acomoda e ekipahe di man den e compartimentonan dentro di e cabina,” nan a specifica.
Clarin a señala cu e avion ya a traslada dia 6 di November e seleccion dirigi pa Edgardo Bauza for di Buenos Aires pa Belo Horizonte pa asina duna cara na e partido disputa diahuebs, dia 10.
E accidente di Chapecoense a tuma luga pa 10’or di anochi ora local di dialuna den cercania di e sero El Gordo, den e hurisdiccion di e municipio di La Union, noordwest di e departamento di Antioquia, cercano na e aeropuerto Jose Maria Cordova de Medellin, situa den e municipio bisiña di Rionegro.
Segun Aeronautica Civil di Colombia, ademas di e 22 hungadonan di Chapecoense, den e avion tabata biaha 28 dirigente, miembronan di e cuerpo tecnico y invitadonan special di e club Brasileño, mescos cu 22 periodista y nuebe tripulante. Den e accidente a muri 75 persona y otro seis a wordo rescata na bida.
Fuente: NTN24