Siman a cuminsa cu un momento importante pa futuro di turismo na Aruba, specificamente pa loke ta trata turismo crucero. Un delegacion consistiendo di Minister di Turismo, Salud Publico y Deporte, Danguillame Oduber, Minister di Comunicacion, Transporte y Sector Primario, Chris Romero, CEO di Oficina di Turismo Aruba (A.T.A.), Ronella Tjin Asjoe-Croes hunto cu coleganan Destination Services Manager, Patrick Melchiors y Cruise Manager, Mario Arends, y di parti di Aruba Ports Authority (APA) Director Interino, Humphrey Tromp hunto cu coleganan Nautical Manager, Urvin Gil, y Senior Pilot, Dino Yarzagaray, a reuni cu ehecutivonan di Carnival Cruise Lines como tambe Royal Caribbean Cruise Lines. Reunionnan a tuma luga na nan sede na Miami. Esaki ta dos di e liñanan di crucero mas grandi na mundo, y como tal, sigur hopi relevante pa Aruba su industria turistico.
E bishita tabatin como obhetivo pa analisa e aña cu ta culminando, pero principalmente pa informa di proyeccionnan, pero tambe brinda informacion di entre otro desaroyo na puerto di Aruba. Esaki no ta prome biaha cu ta trata e topico aki cu liñanan crucero, pero ta di importancia pa mantene esakinan bon informa. Minister y autoridadnan presente a reitera e compromiso di Aruba pa cu e industria y bienestar di turismo crucero. Lineanan a resalta e forsa di Aruba y e relacion estrecho cu ta existi entre autoridadnan y e ehecutivonan di ambos linea.
Turismo crucero ta proyecta pa crece cu 16% e aña aki y pa otro aña ta premira cu e obhetivo di crecemento di 7% lo ser logra. Te cu october e aña aki por mira un crecemento di 23% compara cu aña pasa. E crecemento ta bin primordialmente door di crecemento den lunanan ‘low’ pa turismo crucero, esta di mei pa september.
Carnival Cruise Lines ta proyecta di trece un total di 185 mil turista e aña aki y lo mantene esaki pa otro aña. Di parti di Carnival Cruise Lines, Aruba ta ricibi entre otro e barco ‘Carnival Vista’. Pa loke ta trata Royal Caribbean Cruise Lines conhuntamente cu Celebrity Cruise Lines, Aruba lo ricibi un total di 195 mil pasahero e aña aki, mientras cu na 2018 esaki lo ta proyecta pa 210 mil pasahero. Mester bisa cu Royal Caribbean Cruise Lines y Celebrity a categorisa e ‘rating’ cu pasaheronan ta duna pa Aruba como esun mas fuerte pa nan den Caribe. A reteira cu semper Aruba ta score bon, pero cu Aruba a surpasa su propio ‘rating’ halto e aña aki.
Durante e reunionnan, ambos Minister y autoridadnan a compila informacion cu por yuda den sigui mehora e experiencia di e bishitante. Minister di Turismo a indica cu lo traha riba puntonan di mehoracion na un manera rapido pa asina por sigui mantene e posicion fuerte di Aruba, como tambe sigui mehora ‘negoshi’ pa ambos Aruba como e liñanan crucero. Puntonan di atencion ta inclui: orarionan cu tiendanan ta habri den e area di nos capital, ilustrando cu lo ta bon pa tiendanan ta habri despues di 6 or. Tambe e variedad di oferta cu Aruba mester enfoca riba dje, parando keto aki na ‘experiencianan nobo’ cu tokenan diferente y cultural. A sigur subraya e importancia di sigui pone atencion na ‘congestion’ den trafico, y riba maneho di e fluho di pasaheronan. Hecho ta cu na Aruba pasaheronan ta sinti nan na cas y sigur y esaki mester keda manteni tambe.
Tabata reunionnan fructifero cu lo sigui stimula desaroyo di e industria aki den bon direccion. Algo di importancia considerando cu cada pasahero ta gasta US $112.- promedio durante nan bishita di algun ora na Aruba.