AMSTERDAM, Hulanda- Despues di tabata perdi pa casi dos siman, diahuebs autoridadnan a haya e curpa sin bida di e mucha muhe di Utrecht, Anne Faber. Esaki despues cu e sospechoso, Michael P. a mustra polisnan e luga unda e curpa di Anne tabata ta.
Te cu diaranson ainda polisnan tabata buscando den cercania di Den Dolder, caminda e ultimo señalnan di Anne Faber su telefon a wordo capta. Zeewolde a bin riba mapa, despues di e aresto di P. dialuna. E sospechoso di 27 aña tabata interna den un centro forenses sikiatrico unda cu e tabata wordo prepara pa su regreso den sociedad despues di a sinta un castigo di prizon.
Prome cu P. su detencion na Zeewolde y riba e dia di e desaparicion di Faber, P. tabata tin e auto di su mama na su disposicion. Esaki tabata motibo suficiente pa amplia e area di buskeda. Varios ta e medionan di comunicación cu a bisa cu famia di P. lo tin un cas di vakantie den cercania di Zeewolde, cu P. den su hubentud lo a hunga hopi den e area y cu ariba e dia di e desaparicion di Faber el a wordo mira den e area.
Na 2012, Corte di Apelacion a condena P. na un castigo di 11 aña pa violacion, extorsion, robo cu violencia y posesion ilegal di arma. Diabierna merdia P. su aresto a wordo alarga cu dos siman mas ya cu tabata tin suficiente pruebanan contra di e sospechoso pa tene cera pa mas tempo.
Fuente: https://www.rtlnieuws.nl/