MEDELLIN, Colombia – Autoridadnan Colombiano a confirma cu 76 persona a fayece y otro cinco a sobrevivi den e accidente aereo cu a sosode e anochi di dialuna den cercania di e ciudad di Medellin, unda cu un avion Boliviano a accidenta, caminda cu tabata biaha e integrantenan di e club di futbol Brasileño Chapecoense.
E comandante di Polis di Departamento di Antioquia, coronel Jose Gerardo Acevedo, a confirma e cifra y a splica cu a logra rescata e seis sobreviviente, pero uno a fayece poco despues.
E supervivientenan, cu lesionnan di distinto gravedad, ta e futbolistanan Brasileño Jackson Follman, Alan Ruschel, Marcos Danilo Padilha (kende a fayece den e centro di salud) y Helio Hermito Nato (Rescata diamars despues cu a suspende e buskeda door di condicionnan climatologico), e stewardess Boliviana Ximena Suarez y e periodista Brasileño Rafael Henzel, kendenan a wordo hiba pa hospital y clinicanan di e region unda cu e accidente a sosode.
E avion accidenta, un Avro Regional Jet 85 di e compania Boliviano Lamia, tabata transporta e delegacion cu tabata dirigi pa Medellin pa disputa mañan e partido pa e final di Copa Suramericano cu Atletico Nacional.
E accidente a tuma luga den un region montañoso, den e hurisdiccion di e municipio di La Union, den e departamento di Antioquia (noordwest) cercano na e aeropuerto Jose Maria Cordova di Medellin, situa den e municipio bisiña di Rionegro.
Segun Aeronautica Civil di Colombia (Aerocivil), ademas di e 22 hungadonan di Chapecoense, e avion tabata biaha cu 28 dirigente, miembronan di e cuerpo tecnico y invitadonan special di e club, mescos cu 22 periodista y nuebe tripulante.
“Ta un tragedia cu ta pone mundo na luto, un tragedia cu asina hopi hende morto, ta lamentabel,” e hefe policial a agrega.
E delegacion a sali dialuna for di Sao Paolo pa e ciudad Boliviano di Santa Cruz de la Sierra unda nan a aborda e avion di Lamia cu nunca a yega su destino cu ainda no sa e causanan.
E cuenta oficial di Copa Suramericano a publica comunicaco a suspende e partido di e final cu lo a disputa diamars contra Atletico Nacional.
Fuente: NTN24