Aruba ta un destinacion caro. Aruba di ora cu a cuminsa desaroya turismo, Aruba a posiciona su mes tambe como un producto cu ta uno mas na nivel di prijs mas halto cu e averahe den Caribe y esey ta conforme e strategia tambe, segun CEO di ATA, Ronella Tjin Asjoe-Croes.
No solamente ora cu mira cambernan di hotel, pero ora cu mira e aspecto di aviacion. E parti aereo compara cu e parti di camber na hotel, estadia na Hotel, cu ta compone mas tanto di locual tin cu gasta durante di un vacacion, sigur Aruba ta averahe mas halto cu averahe den Caribe. Mester tene esey na cuenta. No ta un strategia malo, pasobra si bay drenta den e area di competi cu por ehempel un Santo Domingo, nos ta papiando di un diferencia di casi mita di loke ta paga of menos cu mita bo ta paga eynan, compara cu locual ta paga na Aruba. Pensando den terminonan comercial, si tin ya caba un posicion cu a sa di gana, basa di keda atrae bishitante, tin cu haci sigur e esfuersonan pa sigui mira mas bishitante ta bin y ta confia cu en berdad pa Aruba ta paga e prijs eynan, ta hay’e ta bale la pena. Si ta gosa di e posicionamento eynan caba y bo ta coy un strategia pa sigui expande den e mesun posicionamento eynan, na final di dia e ta duna mas ingreso, e ta duna mas beneficio cu si bay cuminsa baha bo prijsnan significantemente y bo bay cuminsa competi como un producto clase B of clase C cu ta den un otro categoria di prijs. Esey ta hopi importante pa semper tene presente cu ora di papia di prijs, en berdad e posicionamento ta otro. E otro cos ta si, cu como ATA ta bisa cu competencia ta hopi fuerte, y cu mester ta conciente cu como destinacion cu awendia e consumidor ta exigi mas. E no ta kisas e mesun dispuesto pa paga e prijs halto eynan pa loke e ta haya. E ta spera mas, e ta spera mas calidad, e ta spera sigur mas componentenan den su pakete. Esey ta algo hopi importante pa tene presente, e CEO a splica.