MEDELLIN, Colombia – E tripulacion di e avion cu tabata transporta e ekipo di futbol Chapecoense di Brasil pa Colombia, a pidi desesperadamente ayudo na e toren di control pa aterisa debi na e escases di combustibel y incluso a purba di busca un pista prome cu el a cay den e intento, un copiloto di un otro avion a relata, segun Reuters.
E siniestro di e avion di e aerolinea Lamia a laga 71 persona morto, incluyendo mayoria di e ekipo y directivonan di e club Chapecoense, den e pio tragedia aereo na Colombia den mas di dos decada y e mas grave den historia di futbol Brasileño.
“Diripente el a bisa na e controlado: nos ta solicita prioridad pa procede na e pista, nos ta solicita prioridad pa pasa pa e localisador, nos tin problema di combustible,” Juan Sebastian Upegui, copiloto di un avion di e aerolinea Avianca, cu tabata proximo den aterisa na momento di e accidente, el a bisa.
Upegui, cual relato na algun amigo a bira viral riba rednan social, a sigura cu otro avion a declara cu emergencia minuutnan prome, pa loke e control di e aeropuerto Jose maria Cordova no a autorisa di inmediato e maniobra di aterisahe y e avion di Lamia mester a bula den circulo wardando asina e permiso.
Di acuerdo cu e testimonio di Upegui, e tripulacion di British Aerospace Avro RJ85 a dicidi busca e pista.
“Nos a cuminsa baha, nan bay full abao. Nan a pasa nos na banda. Nos a mira incluso e luznan di e avion ora cu cu e tabata bahando. Ora cu el a cuminsa baha, el a declara en emergencia, cu e tabata tin problema di combustbel, e si a declara den emergencia (…) Mayday,” el a bisa.
Den su dramatico relato, Upegui a bisa cu e tripulacion a pidi ayudo y a reporta otro problema.
“Awo nos tin un faya total di coriente, nos tin un faya total di coriente, vectornan pa procede pa e pista, ayudo, vectornan pa procede pa e pista (…) cu un voz desespera y eynan tur cos a para,” tabata e relato desespera di e piloto di e avion cu a accidenta, segun Upegui.
Upegui a sigura cu despues cu a perde comunicacion y e avion di Lamia no a responde na e toren, e controlador di vuelo su stem a kibra. Tambe el a conta cu e y su compañeronan di tripulacion a yora amargamente.
Fuente: https://www.lapatilla.com