Na honor di e celebracion di e 40 aniversario di Timeshare na Aruba, Aruba Timeshare Association (ATSA) a laga traha un rapport, cu data cu a wordo colecta den cabamento di 2017, pa asina duna un bista di e industria di timeshare riba nos isla. E rapport a wordo traha den colaboracion cu Aruba Tourism Authority (ATA), y a wordo prepara pa Universidad di Aruba (UA). Lo siguiente ta e di cuatro di e seis articulonan, resumiendo e estudio.
Den un di e seccionnan di e encuesta ehecuta pa compila informacion, a wordo pidi di e encuestadonan pa nan informa tocante e satisfaccion di nan uzo recientemente di nan timeshare na Aruba. E resultadonan ta mustra cu 62% di e encuestadonan tabata extremadamente satisfecho y 24% tabata hopi satisfecho, cu ta significa cu un gran mayoria di e propietarionan, 86%, ta hopi satisfecho cu nan ultimo bishita y nan uzo di timeshare akinan.
Pa por haya un mihor entendimento di e pregunta principal di e estudio cu a wordo menciona anteriormente, e encuestadonan a wordo puntra pa defini nan experiencianan personal cu timeshare na Aruba a base di un grid di diesnuebe (19) diferente atributo. E resultadonan a revela cu e percepcionnan di tur e atributonan relaciona cu e calidad di timeshare a surpasa tur expectativa. Entre e atributonan evalua, e clima y e tempo a clasifica como esunnan mas halto. Otro atributonan cu a score halto ta: e amabilidad di nos hendenan, calidad di e beachnan y e variedad di restaurant. Esunnan cu a score mas abao, cu toch ta cai ariba e calificacion neutral, tabata: excursion y tours, bida nocturno y entretenimento, transporte y trafico, y actividadnan tanto como riba tera como riba awa, cual por refleha e edad di e encuestadonan y e hecho cu nan a participa den e actividadnan aki hopi biaha caba durante nan bishitanan anterior.
Despues a pidi e encuestadonan pa nan kies e tres (3) terminonan mas importante pa describi con nan ta percibi e ambiente of e atmosfera na Aruba durante nan estadia mas recien. E mayoria a percibi e atmosfera na Aruba como un ambiente relahante, feliz y amical.
Di un lista di opcionnan ya estableci, a puntra e encuestadonan tocante nan percepcionnan tocante e caracteristicanan mas distinto of unico cu nan lo asocia cu nan vakantie y e resultadonan tabata e santo blanco y lama turquoise, clima tropical y e solo, e hendenan amabel y feliz.
E siguiente pregunta a pidi e encuestadonan pa describi nan experiencianan actual di timeshare akinan. E opcionnan tabata 1 = super contento y sinceramente encantador; 2= hopi agradabel; 3 = agradabel; 4 = mediocre; 5 = infeliz; 6 = horibel y teribel. E resultadonan ta indica cu e encuestadonan a defini nan experiencianan di timeshare na Aruba como super contento y sinceramente encantador. Solamente 11 encuestado di 2090 a califica nan experiencia como infeliz of horibel y teribel (0.5%). Esaki ta mustra un nivel halto di satisfaccion y sentimentonan positivo relaciona cu e experiencia di timeshare na Aruba.
Ademas, mayoria di e encuestadonan a informa cu definitivamente of muy probablemente nan lo regresa nos isla, cu ta logico ya cu nan ta propietario di un timeshare. E encuestadonan tambe lo recomenda otronan pa bishita nos isla y pa cumpra un timeshare na Aruba.
Sinembargo, e resultadonan ta mustra cu muy probablemente e encuestadonan no lo bolbe cumpra un timeshare na e mesun hotel ni tampoco na un otro hotel.
Resumiendo, e rapport ta indica cu e propietarionan di timeshare ta hopi contento cu e producto timeshare, pero tin algun puntonan cu no a surpasa nan expectativanan completamente, cual ta inclui excursion y tours, bida nocturno y entretenimento, transporte y trafico. E puntonan aki por tin un score mas abao debi na e cantidad di biaha cu e encuestadonan tabata di bishita na Aruba. E encuestadonan ta relaciona relahante, feliz y amical cu e atmosfera di Aruba. Sinembargo, nan no ta haya cu fiesta, baile, golf of e experiencianan exotico ta distinto of unico na Aruba.
E resultadonan tambe ta mustra cu tin algun area cu Aruba por enfoca riba dje pa aumenta e oportunidadnan pa e segmento di timeshare pa sigui impresiona e huespednan y supera e expectativanan. E intencionnan pa ripiti di parti di e bishitantenan y e balor di “word of mouth” pa amigonan ta hopi halto, pero pa bolbe cumpra of e recomendacion pa cumpra un timeshare por wordo mehora. Esaki por ta e resultado di e cambionan den tendencia di e industria y/of ta refleha e edad di encuestadonan.
SATISFACCION, INTENCIONNAN PA REGRESA Y PERCEPCIONNAN
Un “multivariate analysis of variance” (MANOVA) tambe a wordo ehecuta riba e tres variabelnan independiente: satisfaccion general, intencion pa regresa y percepcion di e experiencia di timeshare, pa por determina si tabatin diferencia estadistico significativo entre e datonan demografico, incluyendo edad, sexo, y e cantidad di bishita na Aruba.
E resultadonan ta mustra cu e encuestadonan mas grandi tin intencionnan mas serio pa regresa, pero e satisfaccion general y e percepcion di e experiencia di timeshare ta menos compara cu e encuestadonan mas jong.
Encuestadonan cu entrada mas halto tin mas sentimentonan positivo di Aruba y e experiencia di timeshare. Encuanto e datonan di gasto, hende homber ta gasta mas placa cu hende muher den tur categoria, excepto den gamblemento caminda cu no tin ningun diferencia significativo. Encuestadonan mas jong ta gasta mas placa na deporte acuatico, y en general, e encuestadonan cu entrada mas halto ta gasta mas placa cu e encuestadonan cu menos entrada, locual ta di spera ya cu nan tin mas entrada disponibel.