Security di un hotel High Rise a tuma contacto telefonico cu Strandpolitie y a declara cu e conocido di polis, R. tabata bende droga cu turistanan ariba beach. Na yegada, polisnan a wak cu R tabata para bou di un di e palapanan. Nan a cana bay den su direccion pero R. no a ripara ya cu e tabata para lomba pa e polisnan. Net na e momento ey un homber desconoci, un turista a saca placa for di su saco y kier a duna R. esaki. Ora cu e turista a wak polis, el a cana bay. E ora polisnan a ripara tambe cu R. tabata tin sakitonan den su man cu probablemente tabata yena cu marihuana y tabata cla pa bende esakinan.
Eynan mes a bay over na detencion di R. pa tabata tin droga den su posesion. Durante listramento a bin haya R. cu hopi placa ariba dje, placa cu tabata mas probable di benta di droga. Esaki tambe a wordo tuma den beslag. Na warda di Strandpolitie R. a wordo pasa pa e departamento di narcotica/afpakteam.