Diadomingo marduga pa 3’or y 20, central di polis ta haya un yamada bisndo cu na un cas na Sero Biento, dos persona desconoci a drenta e cas y a purba di atraca nan. Esaki a sosode net ora cu un di e personanan tabata drumi y e otro lanta den e cas. Ta asina cu ta manda patruya di biaha na e adres menciona y eynan, e habitantenan di e cas, kendenan ta dos ruman homber, a conta con dos hende homber desconoci pa nan y cu un arma di candela a drenta e cas y pidi nan pa habri e caha fuerte. E habitantenan a keda para ariba cu nan no sa e combinacion y eynan e atracado cu e arma di candela a pidi pa e celular. Pero na un dado momento a cuminsa un bringamento cu e atracado na unda un di esnan na e cas a haya un sla na pecho cu e cabo di e arma. Despues e dos atracadornan a core sali for di e porta patras. E habitantenan no sa si nan ta na pia of cu auto. E dos atracadornan tabata papia Spaño y no tabata tin nan cara tapa y color di cuero ta bruin. Un tabata tin un tshirt berde bisti cu un bermuda short berde scur cu slof na pia. E otro tabata bisti cu un pechi, tshirt y bermuda short color scur. Nan no a logra bay cu nada. Atraco team a presenta hunto cu slachtoffer hulp na e cas. E caso ta bao di investigacion. Ken cu por a wak algo yama tiplijn di polis na 11141.