E aña aki porfin, despues di basta tempo cu tabata lucha, ta treciendo un campeonato Aruba, segun Giovanni Arends, kende ta presidente di Aruba Bodybuilding and Powerlifting Association. Ta trata aki di e campeonato Ben Reeder Classic. Ben Reeder ta tata di Bodybuilding, ruman homber di Joe Reeder, kendenan a funda IFBB, cu ta conoci awo rond mundo door di 178 pais, cu ta miembro di dje. E campeonato aki ta importante, segun Arends. Ta full Sur America, Centro America, Caribe, Merca y tambe Europa lo bay atende. Arends ta indica cu ta trata di por lo menos 600 atleta cu lo bin participa. El a ricibi un yamada for di Republica Dominicana, cu lo bay bin cu 50 atleta, cual ta un bon noticia. Ta un campeonato cu ta soño di tur atleta. Y una bes cu gana e campeonato aki, e ganado lo bira un profesional. Durante e torneo aki lo bay tin 6 tarheta di profesional. E categorianan ta Body Building, Men’s Physique, Classic Body Building, cual ta 3 pa homber y 3 pa hende muhe, Women’s Physique, Bikini y Figure.
Tambe ta bay tin dos categoria acerca, cual ta bay ta Wellness y Muscle Mass physique.
E lo a un anochi bon ocupa. E ta bay tuma luga den e ballroom di Marriott. Lo bay ahusta full e luga pa e anochi. Si ta bay tin 400 pa 600 atleta, y lo bay tin publico, lo bay haci pa e luga no bay cay chikito.
Dos siman despues lo bay tin e campeonato nacional cual lo ta Mister Aruba, cu ta conoci den pueblo.
E campeonato Ben Reeder Classic lo bay ta di alto nivel y beginnernan no por bay. E campeonato aki ta uno grandi caminda cu tin hendenan cu tin hopi tempo ta practica e deporte. Ta haya atletanan di categoria hopi halto cu ta bay bringa riba e escenario pa haya nan pro-card. E campeonato lo ta uno pisa y grandi.
Tin hopi interes di parti di atletanan Arubiano y tin hopi hende ta preparando pa e campeonato aki. Esey ta un pluspunt grandi pa e organisacion. Te awor aki, tur hende kier bay. A hasta haya nomber di algun beginner cu kier bay.
Segun Arends, esnan cu ta bon ta gana y esnan cu no logra, ta gana e experiencia riba e escenario.
E bon cos ta cu e campeonato di Ben Reeder Classic ta hopi cerca di e torneo nacional. Esun cu clasifica por bay Mexico pa e torneo di Caribe.
Aruba semper, den tur competencia cu a bay ultimo, a gana, a duna un bon cara. Awor no kier manda un atleta cu ta bisa cu e ta 80% cla pa e campeonato aki. Si ta asina, e ora warda algun siman, pa despues bay pa esun nacional. Si no ta keda cla pa Ben Reeder Classic, cu ta un campeonato cu ta di nivel halto cu di Caribe mes, warda dos siman mas, e ora ta bay Mister Aruba.
Hopi biaha e atletanan mes, no ta bin wak e competencia. Nan ta competi y bay pafo, unda cu nan ta bay sosega. E hendenan cu ta bay wak, ta un hurado of delegado. Pa publico lo bay tin 400 of 500 carchi so. Ta pidi pa tur hende keda pendiente. Esaki lo ta un competencia di dos dia.
Pa e siman aki tur cos mester ta cla, mirando cu tin hopi pais ta yamando puntrando unda nan ta bay keda. Una bes cu tur cos ta cla, e paisnan cu lo bay participa, lo ricibi nan schedule tentativo.
Arends a splica cu hopi hende tin biaha ta pidi pa mas competencia, pero tin cu compronde cu bodybuilding no ta un competencia manera cualkier deporte. Loke ta bon ta cu tin hopi competencia den region. Una bes cu competi nacional, porta ta habri di afo. Aruba ta e unico isla cu por bay competi den Sur America. Tin campeonatonan na St. Maarten, Colombia, Corsou, na Surinam, Trinidad. Awo a cuminsa haya mas invitacion pa e atletanan haya mas fogeo pafo. Competencia tin suficiente. Si un atleta bisa cu e kier competi na November, ta busca un competencia pe y si ta den shape, e atleta tin tur derecho di bay, segun Giovanni Arends.