ATIA ta kere firmemente den e principio di mercado liber, sinembargo den e caso di establecimiento cu ta bende producto alimenticio, ATIA ta di opinion cu e cantidad di establecimiento den e categoria aki ta excesivo den comparacion cu e area habita di nos isla. Ademas por a nota un crecimiento enorme den e cantidad di e supermercadonan aki den areanan residenial y na distancia relativamente cortico for di otro. Mirando cu no tin un plan urbano stricto, e miho solucion en berdad ta un moratorium. Consecuentemente, ATIA ta sostene e decision di un moratorium pa dos aña pa e tipo di establecimento aki.
ATIA lo kier wak un control estricto tambe riba e calidad di productonan y nan fecha di expiracion. Na nos hermana isla, esaki a saca afor cuanto productonan expira of daña tabata wordo bendi na e consumidor. Aworaki ta keda na e consumidor pa ta atento na esakinan.
Finalmente, ATIA lo desea pa introduci atrobe control riba e cumplimento cu e primanan manera BBO y BAZV. ATIA semper a boga pa un “level playing field” y parti di esaki ta pa tur compania, incluyendo e establecimentonan aki, cumpli cu nan obligacionnan.