Den luna di Februari 2017, e departamento di Risaralda, localisa na e centro oeste di Colombia, lo ta celebrando 50 aña di existensia y pa celebra esaki lo ta organisando e prome ‘Risaralda Bird Festival’ door di e Gobierno di Risaralda y otro partnernan.
E directiva di e departamento di Risaralda a scoge Aruba como pais di honor invita pa celebra e ocasion aki. Sr. Greg Peterson di Aruba Bird Life Conservation lo ta invitado di honor como expositor central y lo duna un simposio durante e festival.
Un di e obhetivonan di e festival aki ta pa envolve hubentud den e proyecto di conservacion di naturalesa. Di parti di e departamento di Risaralda, ATIA a wordo acerca pa conhuntamente cu Minister di Enseñansa, Sra. Michelle Hooyboer, laga 12-15 hoben for di Aruba entre 11 y 13 aña participa na e festival aki. E focus di e festival ta riba hubentud y lo tin un programa special diseña pa Aruba. ATIA ta gradici Minister di Enseñansa, Sra. Michelle Hooyboer pa sostene e iniciativa aki.
ATIA como organisacion di dunado di trabou ta haya importante pa tin un plataforma pa proteha nos naturalesa, mirando cu nos economia y conservacion di naturalesa ta mara na otro pa sostenibilidad y bienestar di nos comunidad. Cooperacion entre e sector publico y sector priva ta importante pa concientisa nos hobennan encuanto conservacion di nos naturalesa.
E festival lo tuma luga dia 1 te cu 5 di Februari 2017. ATIA di su banda lo zorg pa sponsor pa asina haci posibel pa nos hobennan participa na e festival aki. Pa inscripcion por tuma contacto cu ATIA na 582-7593 of por manda un email na [email protected]. Si tin otro persona adulto interesa pa participa na e festival por tuma contacto cu Sra. Lina Maria Rios di Colombian Adventure na 660-1045 encuanto paketenan obtenibel.