Manera tur aña na maart e Reunion General pa Miembresia di ATIA a tuma lugar siman pasa den un sala completamente yen na Surfside Marina. E proposito di e reunion ta presenta e resultadonan di e aña anterior y alabes vota pa e hunta di directiva pa e resto di aña, den e caso aki 2018-2019.
ATIA tawatin un aña 2017 bastante activo, no solamente pushando cierto tema cu ta importante y crucial pa comercio por funciona y crece debidamente, pero tambe organisando workshops pa sigi desaroya e habilidadnan y experticio di su miembronan y nan empleadonan, sesionan cu ta trese informacion importante, y eventonan pa engrandese e network di e miembronan di ATIA.
Pa aña 2018-2019, ATIA su directiva a wordo reinforsa cu dos miembro nobo, cual ta Sr. Jeannot de Cuba y Sr. Frank Snijders. Pa motibo di responsibilidadnan añadi na su funcion di trabouw, Sra. Gina Habibe a lamenta di mester laga su puesto den e hunta di ATIA. Sra. Habibe semper a aporta activamente y a trese un conocimento y expertisio enorme durante su periodo den e hunta di directiva.
Despues di e parti oficial, ATIA y su miembronan tawatin e honor di presencia un discurso di Prome Minister Evelyn Wever-Croes, caminda e Prome Minister a trese dilanti e vision pa e añanan venidero.
Na prome lugar gobierno lo percura pa na un banda hisa entrada, esaki pa medio di ahustenan fiscal, principalmente un reforma fiscal cu lo drenta na vigor na 2019 y cu lo enfoca riba un shift di impuesto directo pa indirecto. Na otro banda, lo baha gastonan dor di introduci innovacion den e aparato gubernamental.
Innovacion ta hunga un rol esencial den e vision cu a wordo presenta door di e Prome Minister. Lo aplica innovacion primeramente den gobierno pa asina crea un aparato gubernamental mas moderno, eficiente, transparente y servicial. Esaki riba su mes lo facilita comercio, mirando cu comercio ta experiencia e servicio di e departamentonan gubernamental como un obstaculo grandi ora di hasi negoshi.
Ademas di esaki, gobierno lo enfoca riba puntonan manera innovacion civico pa soluciona problemanan den comunidad cu uso di tecnologia, Fintech y regtech pa forma un plataforma financiero di pago digital pero tambe pa trese transparencia, inversionnan den talento di nos hendenan y studiantenan, y entrepreneurship y e-commerce.
A toca e tema di introduccion di e crisisheffing brevemente, caminda e Prome Minister a enfatisa cu ta un medida temporario pa cumpli cu cierto rekisitonan di CAFT y Hulanda mientras ta traha riba un solucion mas structura y sostenible manera e reforma fiscal.