E siman aki ATIA, via medionan di comunicacion, a tuma nota cu gobierno pa medio
di Prome Minister Evelyn Wever-Croes a anuncia su intencion pa revisa structuralmente
leynan di impuesto. Manera menciona den e comunicado aki, esaki lo inclui un rebaho di un
gran cantidad di impuesto directo, y cambia esaki pa un sistema di impuesto indirecto.
ATIA ta boga pa hopi tempo caba pa un cambio di nos leynan cu ta haci cu esunnan cu ta gasta mas, ta contribui mas na caha di gobierno y tambe cu impuesto ta wordo reparti pa tur, segun nan actividad economico, cu ta participa den nos economia.
Simplificacion di e tabelnan di impuesto, si esakinan wordo corectamente introduci, lo ta na
beneficio di e trahado cu lo wordo stimula pa ta mas productivo, mirando cu actualmente
overtime y otro beneficionan pa empleadonan ta causa cu hopi lihe nan ta cay den un
“bracket” mas halto y ta paga substancialmente mas impuesto pa nan esfuerso y
cooperacion.
Un ley simplifica y impuesto indirecto lo por reduci e chens cu algun empresa ta keda sin
contribui na caha di gobierno, asina creando competencia inhusto ariba mercado laboral y
den comercio.
ATIA ta wak cu positivismo e vision moderno y progresivo presenta pa gobierno di Aruba y
ta spera di forma parti di cualkier plataforma pa asina sigui duna forma na e cambio presenta.
ATIA ta compronde cu cambio di un ley asina lo tuma su tempo y ta tuma hopi esfuerso di
varios departamento y instancia, pero gobierno a indica cu lo desea di introduci esaki pa
mas tarda januari 2020.
Si e vision di gobierno aki haya forma lo ta un empuhe dilanti pa pueblo keda cu mas placa
den nan cartera, hisa productividad, hisa drasticamente cumplimento cu deber pa paga
impuesto y un empuhe fuerte pa inversion pa asina activa economia di Aruba, cu lo traduci
den crea mas trabou.