CARACAS, Venezuela – Durante e sesion extraordinario convoca pa e diadomingo aki pa e hunta directiva di e Asamblea Nacional, e mayoria cualifica di e Parlamento, a aproba e proyecto di Acuerdo di e restitucion di e Constitucion di Republica, e orden institucional y democracia.
Den dicho acuerdo ta declara “e ruptura di e orden constitucional na Venezuela y existencia di un golpi di estado, cometi pa e regimen di Nicolas Maduro contra di e
Constitucion di e Republica Bolivariana di Venezuela e pueblo di Venezuela.”
Parlamento a anuncia cu lo impulsa e inicio di un huicio politico contra e presidente di Venezuela, Nicolas Maduro y e realisacion di un discusion riba e denuncianan pa e presunto dobel nacionalidad di e mandatario.
E puntonan di e acuerdo parlamentario:
Declara e ruptura di e orden constitucional y e existencia di un golpi di estado, cometi pa e regimen di Nicolas Maduro, contra di e Constitucion di e Republica Boliviariana di Venezuela y e pueblo di Venezuela.
Solicita na e comunidad internacional activacion di mecanismonan cu ta garantisa e derechonan di pueblo.
Formalisa e denuncia dilanti Corte Penal Internacional y demas organisacionnan cu ta compoetente, en contra di hues y rectoranan di Conseho Nacional Electoral responsabel di e suspension di e proceso di referendum revocatorio y demas funcionarionan responsabel di e persecusion politico di e pueblo di Venezuela.
Procedeer di manera inmediato y di acuerdo cu e mecanismonan constitucional, na e designacion di e magistradonan di e Tribunal Supremo di Husticia, pa garantisa e respet di e derecho di e Venezolanonan pa scoge, mescos cu e independencia di e poder y e respet na e estado di derecho.
Proceder di manera inmediato y di acuerdo cu e mecanismonan constitucional, na e designacion di e 3 rectornan principal y su suplentenan, cu a wordo nombra provicionalmente na December 2014; mescos cu e designacion di e dos rectornan principal y suplentenan cual periodo di ehercisio ta culmina na December di e aña presente, pa nan por garantisa e respet di e derecho di e Venezolanonan na eligi, mescos cu e independencia di poder y respet na e estado di derecho.
Cuminsa cu e proceso pa determina e situacion constitucional di e Presidencia di Republica y convoca na un sesion special di e Asamblea Nacional pa diamars awo, dia 25 di October, pa evalua y dicidi riba e materia.
Conforma un comision di alto nivel Parlamentario pa defini decisionnan pa restitui e orden constitucional.
Exigi na e Forsa Arma Nacional no obedece ni ehecuta ningun acto of decision cu ta contrario na e principionan constitucional di e derechonan fundamental di e pueblo di Venezuela.
Convoca na e pueblo di Venezuela, den e virtud di e preceptonan constitucional, en especial loke a wordo estableci den e articulo 333 di e Constitucion, na e defensa activo, constante y valiente di e Carta Magna, di e democracia y Estado di Derecho, te cu logra e restitucion di e orden constitucional.
Duna publicidad na e presente acuerdo. Dado, firma y seya den e Palacio Federal Legislativo, sede di e Asamblea Nacional di e Republica Bolivariana di Venezuela.
E bancada cu ta sostene e Gobierno, e Partido Socialista Unido de Venezuela, a acusa oposicion di gesta un golpi di estado y ta acusa nan di a comete fraude den e recoleccion di e 1% di e firmanan rekeri den e prome fase, pa e activacion di e referendum revocatorio contra Nicolas Maduro.
E denuncianan aki, cu ta wordo investiga den 7 tribunal penal regional, a conduci na e decision di e Conseho Nacional Electoral di posterga, di forma indefini, e recoleccion di 20% di solicitud den e di dos y definitiva etapa di e proceso cu lo hiba na e realisacion di e consulta revocatorio.
E recabacion di e manifestacionnan di boluntad tabata premita pa e dianan 26, 27 y 28 di October.
Invasion den e Asamblea
Tabata tin momentonan di tension den e sesion special di Parlamento Venezolano, ora cu un grupo di presunto simpatisante di e Gobierno a irumpi den e hemiciclo di e Asamblea Nacional.
Diasabra, den un comunicado conhunto, varios pais miembro di e Organisacion di e Estadonan Americano (OEA), a reitera e yamado na dialogo pa haya solucion pa garantisa e stabilidad y paz na Venezuela.
“E paralisacion di e proceso, premira pa wordo realisa entre dia 26 y 28 di October y e decision di e Poder Hudicial di Venezuela di prohibi salida di teritorio Venezolano di e principal lidernan di oposicion di e pais aki, ta afecta e posibilidad di establece un proceso di dialogo entre e Gobierno y oposicion cu ta permiti un salida pacifico na e situacion critico cu e nacion ruman aki ta atravesa,” e declaracion ta bisa.
E comunicado conhunto a wordo confirma pa Argentina, Brasil, Canada, Chile, Colombia, Costa Rica, Merca, Honduras, Guatemala, Mexico, Peru y Uruguay.
E paisnan aki a boga pa tur e actornan politico avansa den e esfuersonan pa un dialogo y garantisa e pleno respet di e derechonan humano, separacion di poder y fortalecimento institucional na Venezuela.
Punto di inflexion
E secretario general di OEA, Luis Almagro, a pidi e paisnan di e region tuma accionnan concreto na defensa di e democracia na Venezuela.
Almagro a considera cu e decision di e Conseho Nacional Electoral di suspende e proceso di recoleccion di firma pa e revocatorio ta un punto di inflexion y di kiebra di e sistema democratico.
“Solamente e dictaduranan ta despoha for di su ciudadanonan di derecho, ta desconoce e legislativo y tin presonan politico,” Almargo a sostene.
“Ta ora pa tuma accionnan concreto,” e secretario general di OEA a agrega.
Fuente: CNN en Español