Siman pasa Alberto Klabér di Brazil Taekwondo Stichting a ricibi e contribucion for di Migna Ras di Arumia Logistics pa e di 9 Aruba Caribbean Cargo/Arumia Logistics Taekwondo Cup 2016 cu ta tuma lugar diasabra awor dia 11 di September na Centro di Bario Brazil. Esaki lo bay ta e ultimo clasificacion pa Best of the Best 2016 cu ta bay tuma lugar dia 1 di Oktober na Centro di Bario Brazil cu participacion di Surinam, Corsou y Venezuela.
Migna Ras di Arumia Logistics ta sostene e evento aki pa 9 aña caba y por wak un crecemento masha grandi y ta trahando pa e di 10 aña caba. Migna Ras di Arumia Logistics ta desea tur atleta cu ta participa hopi exito y ta spera cu tur por logra clasifica pa Best of the Best 2016. Brazil Taekwondo Stichting ta gradici Arumia Logistics pa nan contribucion. Arumia Logistics ta situa na Olijfistraat 33 na Dakota y Migna Ras semper tey pa contestabo durante e oranan di trabou na 582-4912.