Despues di un temporada di negociacion extenso cu sindicato STA, a logra yega na un acuerdo cu gerencia di Arugas pa loke ta un contrato colectivo. Sr.Roberto Geerman, director di Arugas, ta amplia mas ariba esaki.
Tur negociacion di contrato colectivo tin su retonan, y pa Arugas e no ta diferente. Nan ta sumamente gradicido na e pasenshi di e trahadonan y nan representante. Pero na final di dia e bon noticia ta cu a wordo firma un contracto colectivo nobo cu un duracion di 4 aña.
E acuerdo tabata exitoso, esaki kiermen cu ambos partido lo haya nan beneficionan. Y pa menciona algun di esunnan mas importante, lo tin: un aumento di salario di e 11% den 4 aña, un signing bonus di 500 florin, aumento di productividad y siguridad den trabou, programa di entrenamento pa personal y tecniconan unda cu nan lo keda mantene tambe tur e beneficionan cu tabata existi caba. Algo nobo cu a bin acerca ta e bashi premie.
E retonan ta grandi, pero nan ta convenci cu locual cu a wordo conveni den e contracto colectivo aki sigur lo trece paz laboral den e proximo 4 añanan.
Arugas ta considera su empleadonan manera nan famia, unda cu tin trahado cu tin hopi aña trahando eynan y Arugas ta contento cu su trahadonan y tameb cu e forma con e sindicato a hiba e negociacionnan, basa ariba respet. Esaki ta e unico manera pa haya solucion pa problemanan cu por surgi, asina director di Arugas, Sr. Roberto Geerman, a expresa.
Diferencia di opinion lo mester wordo resolvi cu un bon palabracion y argumentonan, anto un bes mas e director a gradici Sr. Diego de Cuba, di STA como mediador cu semper a intermedia den un bon manera aunke na cuminsamento lo tabata tin diferencianan grandi di opinion pero na final nan a logra e acuerdo.
E proceso aki a wordo tuma algun tempo largo ya cu hopi companianan tin nan retonan, incluyendo e companianan di utilidad. Un echo ta cu e gas ta un producto petrolero cu no ta wordo produci na Aruba. E mester wordo importa ariba prijs cu ta keda fluctua door di mercado, basa riba oferta y demanda.
Aruba semper lo tin e reto como isla den sentido cu ta separa di lama y lo tin un gasto considerabel pa via di transporte y volumen y aspectonan aki ta hunga un rol tambe. Arugas ta dependiente di mercado internacional y asina tambe e gastonan pa mantene ekiponan al dia.
Arugas lo keda carga tur e factornan aki y tur esaki lo mester a tuma na cuenta pa mantene un operacion bon maneha y haya espacio pa keda inverti den ekiponan, infrastructura pero tambe den e sosten di e personal. Asina Sr. Roberto Geerman, director di Arugas a finaliza bisando.