Arubus ta bezig cu e bushaltenan, y esaki a tarda pa motibo cu nan no tabata tin financiamento pa traha bushaltenan nobo. Sr. Teo Croes, director di Arubus ta splica kico ta e siguiente paso pa cu e haltenan aki.
Aworaki Arubus ta bezig cu Aruville, cu ta esun cu tin e contract pa e propagandanan den e haltenan y nan lo pone algun shelter nobo den algun area cu ta mas frecuenta y nan tin un plan pa cu esaki. Green Corridor ta un estorbo den cierto sentido cu e vangrailsnan. Aworaki a pone e haltenan banda di e vangrails y e busnan por para normal. Pero toch tin cierto problemanan, pa motibo cu e pasaheronan no por cruza y no mag cruza, ya cu nan ta hopi peligroso, door cu ta ariba highway. DOW lo mester bay traha ariba esaki, di un manera of otro.
Inicialmente Arubus tambe tabata involucra den e proyecto Green Corridor y a sinta na mesa cu nan, a splicanan con nan ta traha y kico nan lo desea. A priminti na nan, cu nan lo haya un brug, cual no a sosode. Aworaki nan ta bezig cu DOW den varios reunion caba, pa uno, e facilidad pa e busnan por para adecuadamente y dos, e peliger pa ora hende crusa caminda.
E brug na Pos Chikito no a funciona, ya cu ta dificil pa nos hende grandinan subi esaki, y e ta wordo uza mas tanto pa muchanan di scol. Mester bin cu’n campaña di conscientisacion, si ta uza e brug of si ta bay bin un tunel. Ainda tin hopi reunionan cu mester tuma luga cu DOW.
Mas aleu, Sr. Croes a splica cu ta bira dificil pa coy e caminda di Tele Aruba. Ya cu e busnan no por pasa banda di otro, door di e peso. A wordo conseha na Arubus pa no haci uzo di e brug bieu di Pos Chikito. E brug bieu di Pos Chikito ta keda un dolor di cabes pa Arubus.