E aña aki riba 25 di januari 2017 Arubaanse Voetbal Bond pa di 13 aña consecutivo ta organisa e final di torneo Copa Betico Croes. E aña aki bestuur di AVB a dicidi cu ta duna un toke special na e dia conmemorabel aki y a dicidi cu banda di tene e final manera ta custumber di e edicionnan anterior, e aña aki organisa un evento cultural cu ta tuma luga den parkeerplaats di Centro Deportivo Guillermo Prospero Trinidad na Dakota.
E evento cultural aki lo cuminsa for di 2’or te cu 6’or di atardi caminda cu lo bai tin diferente standsnan di artesania, articulo secunda mano estilo di vlooienmarkt y mucho mas.
Pa locual ta e parti musical lo bai tin diferente agrupacionan tipico y dj’s nan cu anima e atardi aki. Alabes lo tin un bar y un cushina bon surti manera cu ta AVB so lo por haci esaki.
Despues di e evento cultural, cual lo termina pa 6’or pm lo bai tin e final Copa BeticoCroes. E ekiponan cu lo ta den e final aki lo ta e Pumanan di SV Britannia enfrentando e abejanan di SV Dakota. E partido aki lo tuma luga pa 7 ‘ or di anochi y entrada lo ta Awg. 5,00 pa adulto y Awg. 2,00 pa mucha bou di 12 aña.
Prome cu inicio di e final lo tin e parti protocolario pa 6:30 pm unda lo tin un parti cultural cu presentacion di Grupo di Baile Gucci Dancers, diferente cantantenan y pa 6:55 pm e conocido cantante Eltienne Yarzagaray, acompaña pa Nico Conner, lo canta himno nacional Aruba Dushi Tera. Despues di himno e sake di bala lo tuma luga y e partido lo inicia.
Un invitacion cordial ta bay pa tur fanaticada di bon futbol y Aruba en general ta keda cordialmente invita e evento cultural aki y pa e gran partido final Copa Betico Croes 2017. Pa e actividad aki Arubaanse Voetbal Bond lo bay tin T-shirt na benta pa Awg. 25,00 cual lo ta obtenibel na oficina di AVB na Centro Deportivo Frans Figaroa. Pa reserva esun di bo por yama libremente na telefon 5877357.