Diadomingo 12 di maart 7’or di anochi amantenan di bon musica lo tin e oportunidad di scucha e popular pianista Curazoleño Randal Corsen na Cas di Cultura acompaña pa su paisanonan Eric Calmes, tocado di guitara baho y Pernell Saturnino, percusionista. Randal Corsen Trio lo toca musica di Jacobo Palm, Rudy Plaate, Jacobo Conrad, Padu Lampe, Rufo Wever y di Randal Corsen mes. Bin prepara pa goza un bom!
Carchi di entrada ta costa Afls 45 pa adulto y ta obtenibel na Plaza Bookshop, De Wit & van Dorp Bookstores y prome cu e concierto, na Cas di Cultura. Carchi pa miembronan di Kunstkring (Afls 40) y pa mucha (Afls 15) lo ta disponibel na porta e anochi di e concierto. No perde e chens aki pa scucha nos musica Arubiano y Antiano.
RANDAL CORSEN. Despues di gradua cum laude for di Brabants Conservatorium na 1995, Randal Corsen a cuminsa actua regularmente den e Latin/Jazzband Bye-Ya y como “sideman” di Izaline Calister. Na 2003 el a publica su prome CD, Evolushon, un album di jazz cu ta mustra influencia fuerte di musica Antiano y di otro islanan di Caribe. Cu e CD aki, Randall a gana e un Edison Music Award. Na 2005 Randall a saca un CD clasico cu ta contene varios cantica di su tatarabuelo Joseph Sickman Corsen (1853-1911) un compositor y escritor. Na 2013 Corsen a saca e album Symbiosis di musica jazz cu tambe ta mustra influencia di elementonan Antiano, clasico y otro ritmonan. Riba iniciativa di e mezzosoprano Curazoleño Tania Kross, Randal Corsen a skirbi e opera Katibu di Shon basa riba e libreto di Carel de Haseth, otro Curasoleño. Ademas di ta activo como pianista y compositor, Corsen, nací na Corsow 1972, ta duna les na conservatorionan di Amsterdam y Utrecht.
Eric Calmes ta un tocado di guitara baho nací na Corsow (1955) kende a haci un nomber pa su mes na Hulanda caminda el a toca varios biaha na e North Sea Jazz Festival, cu diferente musico di jazz y cu musiconan di America Latino. Na añanan ’70 Calmes a cuminsa su carera musical den mundo di salsa y el a sigi den jazz. Cu su propio grupo Zamanakitoki Calmes a desaroya un fusion di ritmonan Caribense cu jazz y el a profundisa su mes den su ideanan musical innovativo y unico . Eric Calmes a studia na Academia Musical Sweelinck na Amsterdam, y el a duna les pa añanan largo na Conservatorio di Rotterdam. Ademas di toca su guitara baho, Eric ta compone y ta haci areglo pa diferete orkesta y cantante. El a coopera cu produccion y grabacion di mas di 100 CD’s..
Pernell Saturnino ta un percusionista naci na Corsou (1962) cu musica di tambu den su venanan. Su wela, su sobretio y su sobretia tabata entre esnan cu a origina y desaroya e ritmo cu nos conoce awe como “tambu”. Su omo cu tabatin un grupo folklorico masha conoci na Corsow a hiba Pernell bay toca “wiri” tempo e tabatin apenas ocho aña. E siguiente luna mes Pernell a siña toca tur drum, e tambora Venezolano, conga, drum tambu, chapi y timbal. Pernell su musica ta mustra influencia di musica di Mongo Santamaria, Tito Puente, Miles Davis y Chick Corea, entre otro. Na edad di 19 aña Pernell a tuma les di e percusionista Mexicano José “Pepito” Reyes na e Instituto di Musica na Corsow mientras e tabata toca pa un banda di un hotel local cu tabata presenta shows internacional. Asina Pernell a absorba ritmonan di Brazil, Cuba, Republica Dominicano, Puerto Rico y di Trinidad. Na 1988 Pernell a drenta Berklee College of Music na Boston caminda el a studia cu maestronan manera Giovanni Hidalgo y Jesus Alfonso. Na Berklee el a sera conoci cu musica di Tony Williams, Mino Cinelu, y Miguel “Angá” Diaz. El a haya oportunidad tambe pa toca y actua cu Gilberto Gil, Rebecca Paris y cu su mentor y amigo Danilo Perez. Despues di gradua di Berklee, Pernell a toca cu Paquito D’Rivera y otro orkestanan famoso. El a participa e.o. den e United Nations Orchestra, e grupo Calle 54, e orkesta WDR, y e Caribbean Jazz Festival. Pernell a colabora cu hopi otro artista, entre nan, nada menos cu Wynton Marsalis, Chick Correa’s Electrik Band, Izaline Calister y otronan di fama internacional. Su colaboracion cu Randal Corsen ta bay bek varios aña.