Dia 10 di December proximo lo ta un dia di famia den Centro Deportivo Betico Croes ora cu e federacion di volleyball, esta AVA organisa nan ultimo actividad pa loke ta e calendario di actividad 2016. Cu e meta pa promove e deporte di volleyball bou di e mas hobennan, AVA a dicidi pa organisa un campeonato pa muchanan bou di 13 aña di edad (9 – 12 aña). E actividad aki lo inicia pa 9.30 di mainta y lo termina pa 12or di merdia y lo ta den conexion cu e celebracion di e ASU Olimpiada 2016.
E deporte di volleyball ta masha gusta bou di nos muchanan, principalmente na nos scolnan caminda un gran cantidad di scol basico y avansa ta cada aña ta participa na e competencia di deporte escolar organisa pa IBiSA, esaki den e categorianan di mucha muhe y mucha homber. Es mas na nivel competitivo, e seleccion di volleyball femenino y masculino di Aruba a caba di hunga weganan di cualificacion mundial den nos region caminda nan a demostra un bon nivel y a bataya fuerte contra e mihonan. E federacion di volleyball ta traha duro pa hisa e nivel di e deporte na Aruba y pa e motibo aki a trece un entrenado Hulandes pa yuda cu e desaroyo di nos hungadonan como tambe di nos coachnan.
Un danki sigur na Lotto, e Loteria di Aruba pa medio di Comision di Subsidio a yuda cu e contribucion na e dia di volleyball pa muchanan bou di 13 aña di edad.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.