Aruba un biaha mas den luz negativo internacionalmente, caminda cu tin mas di 100 persona di nacionalidad Cubano cu ta pega na Aruba.
E pasaheronan a yega Aruba for di Guyana, cu Aruba Airlines. Segun un di e personanan afecta, den su declaracion duna na prensa internacional, autoridadnan no ta worry pa soluciona e caso, pa cual nan a haya nan mes obliga di pone musica den e terminal aereo pa asina yama atencion pa nan caso.
Un escala na Aruba di 45 minuut, ya caba a pasa cuater dia. Segun e afectadonan, e aerolinea a bisa di tin problema cu su brakenan. Pero mas informacion no a wordo suministra na nan. Esaki sigur ta un situacion hopi fastioso, pasobra e pasaheronan tambe ta den incertidumbre di kico lo pasa cu nan ora cu nan yega Cuba bek. Kico lo para di nan trabao. E pasaheronan Cubano ta teme cu lo por tin persecusion di un of otro forma, ora cu nan yega Cuba bek.
Ta spera cu e caso aki yega na oido di nos minister di Turismo, Sr. Dangui Oduber y asina purba na yega na un solucion mas pronto posibel.