Fundacion Pa Hende Muhe den Dificultad ta organisando un actividad cu tin e nomber di “Orange Aruba”. Ta trata di 16 dia di actividad cu e meta di conscientisa comunidad tocante violencia contra hende muhe.Minister di Enseñansa y Famia, Michelle Hooyboer-Winklaar tabata presente na e apertura di Orange Aruba y a bisa cu esaki ta un iniciativa mundialmente conoci pa duna sosten na e fecha 25 di November cual ta e dia contra violencia di hende muhe.
Rond mundo, hopi hente ta reuni pa renoba nan compromiso pa loke ta trata eliminacion di violencia contra hende muhe y mucha muhe, e mandatario a bisa. Na Aruba a traha cu diferente fundacion relaciona cu e tema aki. Orange Aruba ta un movemento cu ta pone atencion riba e tema aki durante 16 dia consecutivo, pues te dia 10 di December. Fundacion Hende Muhe den Dificultad ta e motor tras di e loke tin di haber cu e tema aki, pero tambe tin otro personanan cu ta dunando sosten na esaki, e mandatario a bisa.
E Minister ta di opinion cu ohala lo por tin un solucion rapido na e problematica aki, pero lamentablemente e ta tuma hopi esfuerso pa por conscientisa hende cu violencia domestico ta algo real, cu ta tuma luga tur dia. Sinembargo, ta algo cu nos por cambia y traha hunto pa por wordo elimina.
“Esey ta e aspecto positivo di un dia asina aki. Un dia tristo, eigenlijk pa tin un fecha cu ta trata e tema aki, pero na otro banda cu bo ta wak cuanto hende, cuanto diferente grupo di hende ta trahando riba e tema aki”, asina Minister di Enseñansa a indica.
Tur dia mester sigui traha pa dilanti, hunto cu e partnernan pa por yega na e conscientisacion aki, e Minister a finalisa bisando.