Aruba tin tur ingrediente pa sigui evoluciona e turismo crucero

1

Orador principal di e Cruise Symposium Aruba (CSA) 2017 tabata Sr. Amilcar Cascais, un veterano di e industria cu mas cu 25 aña di trayectoria. Cascais a comparti su presentacion cu un audiencia local, consistiendo di autoridadnan portuario, tour operators y guides y otro socionan directamente conecta cu nos turismo crucero. Tur tabata invita na e evento cu Aruba Tourism Authority (A.T.A.) ta organisa pa di tres aña.
E tema di su presentacion tabata ‘Con pa ta exitoso den e industria crucero’ cual contenido a duna un guia na e participante y den cual el a elogia encuentronan cu ta incorpora miembronan activo den e industria pa traha y progresa hunto.
Entre e puntonan cu a trece dilanti, Cascais a enfatisa riba e necesidad di renoba bo producto identificando su esencia, pero dunand’e un bachi nobo pa e keda competitivo. “Boso tin un isla bunita; mester sigui ahusta e producto di un manera cu ta beneficia e industria y su necesidadnan. Asina ta haya un balor comercial mas grandi cu e industria lo kier sigui bishita y te hasta percura pa bishitanan adicional na Aruba,” Cascais a splica.
E turista crucero di awendia ta busca pa biba experiencianan unico y hopi tipico di cada destino cu e ta bishita. Basa riba e tendencia aki, Cascais ta sinti cu henter Caribe tin mester di refresca su imagen y producto.
“Di loke mi por a wak awe, mi ta hopi satisfecho y te hasta impresiona pa mira con bon organisa Aruba ta; compronde e necesidadnan di e industria. Si sector priva hunto cu esun publico mester asumi e reto di enfoca mas riba innovacion y ofertanan exclusivo, pa cual porcierto por cobra mas … tanten cu e balor di exclusividad / personalisa tey.
Na final di dia, industria crucero ta un negoshi y su proposito ta pa haci ganashi. Liñanan crucero ta bay unda cu e pasaheronan ta pidi pa bay, pero tambe unda cu ta mas rendabel pa nan mes. Cascais a comparti cu e participantenan di CSA 2017, con companianan crucero ta tuma nan decisionnan prome cu nan inclui un destinacion riba nan iterinario. “Tipo di eventonan asina ta crucial”, segun e experto, cu ta kere cu A.T.A. ta riba e bon caminda door di percura pa sigui sinta na mesa cu tur partido envolvi pa evalua, dialoga, planifica y ehecuta un vision comun.

 

1 COMMENT

  1. Aruba tiene todo el potencial para un turismo de altura, pero los impuestos y los precios para el turista son altos… mayormente en lo cruceros llegan americanos, europeos u otras nacionalidades que rara vez uno los ve de compras debido a los precios altos en comparación a otras islas.. tambie se debe tomar en cuenta el ingreso de los arubianos que no les permite disfrutar mucho debido a los costos…por ejm: en el parque Arikoc no debería ser el mismo pago para los arubianos que para los turista, por eso uno ve poca gente de la zona disfrutar de todo lo que la isla tiene para dar…. feliz día

Comments are closed.