Nacionnan Uni a organisa dos dia di seminario riba e tema ‘ Ley di Refugiado’ cu Aruba como anfitrion. Den Renaissance Convention Center e participantenan na e seminario aki durante dos dia ta tende di e ultimo desaroyonan riba e tereno aki y e solucionnan pa un tema asina agudo. Desde di Dos Guera Mundial mundo no a conoce un movecion di refugiado asina grandi manera tin actualmente. 22 miyon hende ta migrando di nan pais, di un lugar pa otro pa motibo di guera, di hamber, secura, persecusion y asina por sigui. Minister Arends a habri e seminario enfocando di ta sinti su mes masha honra di por yama bon bini na Nacionnan Uni na Aruba. “Mi a studia International Public Law y tabata masha entusiasma ora mi a haya e invitacion pa dirigi palabra awemainta riba e topico aki.”
Despues di a tene su discurso Arends a bisa cu no ta prome bes cu Aruba ta cede di reunionnan di Nacionnan Uni. “Ya caba nos tin e United Nations Centre of Excellence pa SIDS (Small Island Development States) cu tin un establecimento permanente aki na Aruba. Durante e ultimo lunanan nos a mira diferente conferencia di Nacionnan Uni na Aruba. Awe un biaha mas e High Commisionner pa Refugiadonan a scohe Aruba pa ta cede di un serie di curso y trainingnan technico pa region. Ta yena mi cu orguyo con un pais manera Aruba cu aunke e no tin un cuerpo legal internacional – nos ta pertenece na Reino Hulandes – a sa di posiciona su mes internacionalmente pa atende cu nos problemanan energetico local, pero tambe di un manera of otro contribui y brinda un input na otronan pa loke ta trata e ambito internacional manera eleccion di Reino Hulandes den e Conseho di Seguridad Hulandes.”
E seminario di UN ta enfoca riba dos aspecto hopi interesante, un di nan ta e topico di Refugiado, pero tambe e asunto di personanan apatria, esta personanan cu no tin un nacionalidad. Nacionalidad ta un derecho humano. Minister Arends: “Mi ta sigur cu e instancianan di gobierno presente manera DBB, DIMAS y Cruz Cora ta sigui e cursonan cu hopi atencion. Awemainta nos a wordo elogia tambe door di e representantenan di e High Commisioner pa Refugiado pa e Plan di Accion cu nos tin cla ora un persona pidi un asilo di refugiado aki na Aruba. Nos ta haya aki 10 peticion a base anual, pero nos ta monitorea e situacion den region diariamente. Esaki pa wak si nos mester ahusta nos plan y na ki momento.”
Arends a bisa cu e sorto di seminarionnan asina ta hopi importante pa intercambia conocimento. Di nos conocimento y esun di otro paisnan na nos. “Refugiado ta bin den tur nacionalidad y di tur pais. Importante ta pa reconoce e status di refugiado y kico ta e drechonan di un refugiado na momento cu e haya asilo.”