Relaciona cu e sistema tropical Matthew actualmente, segun director di Meteo, Marck Oduber, e tabata un ola tropical fuerte den e parti Mar Atlantico cu tabata tin west noordwest y por a influencia e parti Caribense y tambe por a influencia hasta pasa panort di Aruba y causa , manera cu a pone den pronostico, pa duna chens na awasero y haci lama un tiki turbulento tambe. E sistema, manera menciona, avionnan di horcan a bula aden y esey a indica cu e sistema aki tin mas forsa y nan a clasifik’e como Ciclon Tropical. E proyeccion di Matthew ta pone cu e ta pasa tiki panort di Aruba, mas den e oranan di marduga di diabierna y e ora eynan esey ta pone cu e distancia di e ciclon tropical aki ta basta cerca di Aruba cu ta bisa cu toch ta necesario pa saca un tropical storm watch pa e isla di Aruba relata cu e sistema aki, door cu e bientonan di e sistema aki, maske cu e biento fuerte tur ta keda panort di nos, toch ta buta un watch, pasobra tin e probabilidadnan di eror den movecion di ciclon tropical, cu e por move tiki mas zuid loke a wordo pronostica. Pa cautela ta pone un tropical storm watch, bisando cu tin un sistema tropical den mar Caribe cu ta moviendo den e direccion y esey por causa bientonan fuerte di mas cu 34 nudo. E pronostico mes ta indica cu e proximo oranan, bayendo diahuebs y diabierna, ta mustra cu e aire ta bira mas humedo y instabil. Esey ta duna chens di algun yobida, de bes en cuando compaña pa lamper y strena. E cantidad por core entre 10 y 40 milimeter pa dia y esey claramente si e area di awasero compara cu lamper y strena por ta tiki fuerte, por causa inundacionnan di corto dunacion, despues e rioleringnan por verwerknan.
Di dos ta cu e biento lo ta cambiando di direccion, ora e ta moviendo mas cerca di nos y ta anticipa cu mas parti di diabierna principalmente ta bay sinti mas biento cu un componente di west y e ora eynan esey tambe ta bay yuda pa haci e lama tiki mas brabo, specialmente e parti unda e area di hotel ta, unda ta protegi. Desde awe Meteo a saca un advertencia pa botonan chikito, pa tuma bon nota di esaki cu biento ta boltia, lama ta boltia, probablemente y dependiendo con cierto e ciclon tropical pasa banda di nos por haya cu e lama ta tiki mas bruto of menos bruto, pero ta bon pa cautela, tuma e medidanan di precaucion relaciona cu esey.
Tambe eventualmente e ciclon tropical aki lo pasa Aruba voorbij, pero por haya forsa y bira un horcan y despues sigui su ruta pa Jamaica. E ta importante pasobra ora e ta moviendo west, e mester hala bay nort, e ta bay keda manda loke ta yama resake den nos area, cu ta keda mantene e lama bruto. Ta calcula pa mas dia, esta dialuna pa diamars, ainda e lama hasta na unda e areanan protegi ta, lo keda tiki bruto y probablemente lo mantene e aviso di botonan chikito.
Pa e awasero ta anticipa aunke cu e sistema pasa voorbij, ta haya cu dialuna diamars, e area ta keda humedo y ta haya tin biaha cu e zona di convergencia intertropical di Sur America ta hala bin ariba y duna chens pa algun yobida.
Por bisa cu a pone un tropical storm watch pa ta sigur, si tin cualkier eror den e movecion di e ciclon tropical aki, e ora por avisa pueblo den un sistema mas lihe. E tropical storm watch ta wordo haci den cooperacion cu Servicio Meteorologico di Aruba, den deliberacion cu National Hurricane Center y ta saca loke ta mas prudente y esey tabata e caso loke tabata prudente pa pone un tropical storm watch. Probablemente bientonan lo ta fuerte pa un tropical storm watch, pero ta bon pa pone, pasobra semper un pronostico ta keda un pronostico y e bientonan di tropical storm watch mes ta kedando mucho cerca di nos pa bisa cu no ta haci’e. E ora ta haci’e pa ta sigur. Sabiendo cu tin un tropical storm watch y mirando e pronostico cu a indica cu durante awasero por tin rafaga di biento tiki fuerte, ta bon pa tira un bista den cura y na dak si tin buraco pa tapa nan, pasobr tin chens di awasero den e proximo dianan y tambe biento por bin di diferente direccion y ta pone cu maske Aruba ta conoci pa biento fuerte for di Oost, pero porta e ta bin di direccionnan contrario, por causa cu cierto areanan cu biento di oost fuerte no ta haci nada, pero biento di west of zuid tiki fuerte, por haci cu un dak di zim por los.
Mirando cu loke a buta, Aruba tabata den alerta.