Na comienso di siman representante di Nacionnan Uni, cu ta trata cu refugiado a saca un comunicado, unda cu ta bisa cu tur emigrante Venezolano lo haya status di refugiado. Sr. Rino Hermans ta splica kico esaki ta nifica pa Aruba.
Departamento di Calamidad ainda no a ricibi e resolucion ni tampoco e condicionnan cu a wordo expresa dialuna. Di berdad, Aruba , Bonaire y Corsou ta e islanan mas cerca di Venezuela. E otro paisnan, e.o. Colombia y Brazil ta pega cu Venezuela. Pero di berdad e situacion ta un menasa pa nos teritorio. Pero Rampenbureau mes no a ricibi niun informacion di e publicacion unda cu nan ta considera tur Venezolano den exterior como refugiado.
Pa loke ta bay pa 2018, tin 4 boto cu a yega costa noord di Aruba y te ainda niun hende no sa kico a para di e personanan y esaki ta pone cu mester ta mas alerta. Sr. Hermans a enfatisa cu desde cu nan a cera e fronteranan, por mira cual ta e metodo mas uza pa yega Aruba. Pero e comunicado publica door di Nacionnan Uni, ta pone cu Aruba ta bay ta mas alerta. A pesar cu Aruba, desde 2013 ta ariba alerta caba cu e situacion na Venezuela. Pero por wak cu e desesperacion ta birando mas grandi, cu mundo a pone bista ariba Venezuela, aunke Aruba cu ya caba for di 2013 Aruba tabata ariba alerta.
Aruba tin su plan pa shelter pa refugiado ta vigente caba. Departamento di Calamidad ta revisa e plan aki cu ta uno dinamico, ya cu e situacion ta cambia cada rato. Tur siman ta reuni, repasa tur e informacionnan cu ta sali y asina ta keda ariba alerta. For di 2006 caba tabata tin plannan, pero esaki ta wordo revisa cada biaha segun e situacion.
Actualmente e situacion ta bira mas serio awo cu e frontera ta cera, presidente Maduro ta pone prohibicion ariba avionnan den su teritorio. Esaki ta pone cu e crecemento den ilegalidad ta pone Aruba y Corsou tambe ariba alerta.
Tempo cu e fronteranna tabata habri, bou di circumstancianan normal, y awo cu e medidanan tuma unilater di Venezuela, ta pone cu e parti di ilegalidad ta bira mas activo. Pero na mes momento ta bira mas peligroso. Ya cu na momento cu nan drenta ilegal, niun hende no sa ken a drenta, con nan a drenta y cu kico nan a drenta. Den dos luna, ya caba tabata tin dos caso di ilegalnan ta drenta nos isla.
Actualmente tur departamento ta ariba e mesun liña pa loke ta e situacion na Venezuela, y tur siman ta repasa tur informacion. Rampenbureau ta coordina e situacion y ta wanta e alerta ariba skerpi.