Den Haag, HULANDA- Un representante di Parlamento di Aruba lo ta presente durante e tratamento pro- forma contra di e agentenan policial cu ta wordo sospecha di tin de haber cu e morto di Mitch Henriquez. Asina abogado di famia di Mitch Henriquez a informa diaranson.
E presidente die comision di husticia, Desiree De Sousa-Croes, lo ta presente durante e tratamento di e caso ya cu e comision ta preocupa pa e curso di e investigacion y e caso penal.
Mitch Henriquez a fayeca na 2015 despues cu el a wordo deteni durante e festival di musica na Den Haag. E agentenan lo a aplica nekklem, door di cual Henriquez a perde conocimento.
Imagennan di video
E preocupacion di e Arubiano a cuminsa despues di e declaracion di e agentenan cu Henriquez lo a bira malo den e bus, mientras cu for di imagennan di video por deduci cu esaki no ta e caso.
Autoridadnan di Aruba ta asombra cu e agentenan no a wordo deteni di biaha, aunke sea ariba sospecho di a duna declaracion falso. E agentenan en cuestion no a wordo deteni ni tampoco encarcela, observa of getap, segun e comision Arubiano. Tampoco a prohibi nan di tin comunicacion cu otro, pa cual nan tabata tin oportunidad di haci tal.
No tin declaracion
A bira duidelijk pa e comision cu tur e (ex) agentenan policial sospechoso den e caso aki a declara cu no tabata tin declaracion, mientras cu otro agentenan, bou di cal e comandante a duna un declaracion detaya riba un interogacion cu a tuma luga e anochi di e incidente. Segun De Sousa- Croes agentenan policial a comunica cu otro riba e caso aki den un grupo di Whatsapp.
E comision di parlamento di Aruba ta haya cu net den un caso manera esaki mester haci tur lo posibel pa despeha cualkier duda riba e investigacion. E ta haya cu e autoridadnan hudicial mester ta mas transparente, pa asina e investigacion por wordo controla.
Investigacion propio
E comision ta di opinion cu ta di suma importancia pa ta posibel pa e defensa di e famianan mes laga haci un investigacion riba e sospechosonan y den caso cu sea posibel, tambe ariba e tres agentenan policial cu tabata sospechoso den prome instante.
Aruba ta haya straño cu Ministerio Publico mes no a conduci un investigacion na e background di e sospechosonan.
Cu e abogadonan di e famia no mag haya sa e identidad di e polisnan, manera cu Corte mes a dicidi recientemente, pa e comision esaki ta linea recta contra di un estado di derecho democratico. Segun De Sous- Croes, e nomber di e sospechoso mester ta den e file di e caso.