Sra. Jennifer Arends-Reyes a forma parti di e delegacion cu ta representa fraccion di AVP na e reunion cu representantenan di IMF (International Monetary Fund) cu ta bishita Aruba cada dos aña pa un mision pa busca informacion pa por evalua pais Aruba ariba diferente aspecto macro economico y duna nan sugerencia y punto di bista. Durante e reunion aki a trece padilanti un biaha mas e importancia di Turismo pa Aruba y e bon maneho di Turismo pa asina yega na hisa e balor ‘value’ di locual nos ta ofrece. Turismo rond di mundo conoce un ciclo di bida of un ‘life cycle’ y mester analisa y realisa den cual fase cada pais ta y adapta nan mes na esaki. IMF a categorisa e destinacion di Aruba como uno madura of ‘mature’ manera nan a bisa y nan a keda sumamente impresiona con nos Tourism Authority di nos isla ta adapta na strategia di mercadeo basa ariba e ultimo tecnologianan y strategianan cu tin pa mercadia e producto Aruba. Un destinacion cu ta cai bou di e categoria ‘madura’ mester tene na cuenta varios factor cu ta influencia e competitividad. Factornan importante manera infrastructura, impacto ambiental, maneho di destinacion y perdida di vitalidad economico. Nos sa cu infrastructura di un pais y e percepcion di e turista ariba esaki ta un factor determinante na momento cu ta escohe pa un destinacion of no. Tambe pa esnan cu lo brinda servicio tanto di aerolinea, crucero of tour operators e parti di efectividad y infrastructura ta keda tambe determinante na momento cu ta scohe pa un destinacion. Impacto ambiental tambe ta un factor cu mester keda enfoca hopi riba dj’e pa Aruba no perde e harmonia entre desaroyo y autenticidad. Den e parti di maneho di destinacion por bisa cu Aruba Tourism Authority a percura pa desaroya su mes di un DMO (Destination Marketing Organization) pa un DMMO (Destination Marketing and Management Organization). Esaki ta encera cu di Desination Marketing awor nan ta enfoca como organisacion ariba e mercadeo y maneho y coordinacion di Aruba como destinacion. Y e ultimo factor cu tambe ta di suma importancia pa Aruba cu ta e perdida di vitalidad economico ta keda calidad. Esaki netamente ta locual e representantenan di IMF a keda pone enfasis ariba dj’e calidad y balor di Aruba como destinacion mester keda hopi halto. Aruba no por permiti su mes pa prijsnan baha a costo di atrae mas turista. Na momento cu atrae turistanan cu tin mas poder di compra y cu ta menos sensitivo pa prijs e ta contribui na e sostenibilidad economico no solamente pa Aruba pero pa henter e region.
Si nos tuma e cifranan di e dos prome lunanan di aña 2017 nan ta sumamente alentador y ta duna un bon comienso pa 2017 su Turismo. Si nos tuma e cifranan preliminar di luna di Februari 2017 nos por a nota cu e ocupacion di cambernan a yega na 87.9% compara cu 83.5% di Februari 2016. Un crecemento di 4.4%. Un otro aspecto importante ta e ADR, e promedio di e prijs di camber pa dia a subi di $308.11 pa $ 315.71 pa Februari 2017. E combinacion di ocupacion mas halto di cambernan huntu cu un promedio di prijs di camber pa dia mas halto a subi e REVPAR significativamente cu 7.8% compara cu e aña anterior. E REVPAR a subi di $ 257.38 pa $277.53 na Februari 2017. Den e cuadro di metanan pa nos isla y pa percura pa nos tin un turismo stabiel nos por bisa di ta sumamente orguyoso di tur e partnernan y profesionalnan cu ta traha na beneficio di desaroyo di nos isla Sra. Arends-Reyes ta termina bisando.