Diadomingo atardi e ASU Olimpiada 2016 a yega su final den Centro Deportivo Betico Croes. Dilanti invitadonan di honor, atleta y dirigentenan di e federacionnan deportivo participante, Aruba Sport Unie a celebra e clausura di un otro exitoso Asu Olimpiada. Den su calidad como presidente di ASU, sr. Gerald Franca a dirigi su mes na esnan presente cu palabranan elocuente pa e atleta,dirigente y tur esnan cu ta aporta na e deporte di Aruba. Na e atardi aki tambe a duna e merecido reconocimento na esnan cu a laga nan nomber graba den e historia di e deporte di nos pais. Na e ocasion special aki ASU a reconoce algun baluarte cu a contribui y aporta grandemente na e deporte Arubano.
Esunnan cu a haya e reconocimento como muestra di aprecio ta Rudy Wong, Candi Wernet, Juby Richardson, Watty Heyliger, Kenneth Alias y Joseph Larmonie, e ultimo a ricibi su plakaat como miembro honorario. Mester bisa aserca cu cada federacion tambe a haya e oportunidad di reconoce nan atletanan mas destaca den e aña deportivo 2016. Siguientemente e “Most Valuable Player” di cada federacion. Como MVP den Gymnasia a keda Amika Every y Kim de Vries mientras como e MVP nan den Kendo a keda Vicent van Lindert y Szilvia Farkas. E Organisacion Caballista Arubano tambe a nombra su MVP nan, esakinan a bira Jordy Wever y Genisis Pietersz. Pa e federacion di Tang Soo Do esakinan tabata Shanro Thomas, Jaidyleen Tromp y Cory Aragon. Un pabien sigur na Aruba Sport Unie como tambe e federacionnan deportivo cu un bes mas a engrandece e ASU Olimpiada 2016.
Un danki na Lotto, e loteria di Aruba cu pa medio di Comision di Subsidio a subsidia henter e evento di e ASU Olimpiada 2016 organisa pa Aruba Sport Unie.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.