E dirigente y mayornan di Aruba Soccer Academy (ASA) recientemente a logra un donacion significante pa e miembronan di otro teamnan, proveyendo sapato special pa hunga futbol pa mas di 60 hoben. E accion y gesto di e famia di Aruba Soccer Academy ta refleha e hermandad cu ta resalta den e mundo di futbol na Aruba. Esaki ta momentonan unda cu e mayornan ta uni, hunto cu dirigentenan y ta logra cosnan bunita pa e prohimo, unda cu nan ta gosa ainda mas di nan deporte faborito.
E experiencia bunita aki, cu un caracter di “pay it forward”, a cuminsa durante di un wega amistoso riba un veld P’ariba di Brug ora cu David “Appie” Abdul a ripara cu e hungadonan di e team opuesto no tabatin sapatonan special pa hunga futbol. E muchanan tabata hungando cu keds normal na pia.
El a puntra tocante di e sapatonan y a haya como contesta cu e muchanan no tin. Tabata bisto cu nan ta hunga motiva pa nan amor pa e deporte, pues cu of sin e sapato special nan ta subi veld cu hopi entusiasmo. E situacion a resulta den un peticion special pa tur mayor di Aruba Soccer Academy den nan “chat group”. David Abdul a pidi un fabor, esta pa ken cu por tin sapato di futbol uza cu nan no ta haci uzo mas di dje, pa nan regala esaki na e team di hoben di San Nicolas.
Un balente cantidad di sapato den bon condicion a wordo entrega, haciendo un donacion grandi posibel. Un hoben ta crece lihe, su sapatonan ta bira chikito p’e, y ta pasa cu frecuencia cu e sapatonan aki ta keda warda den cashi pa por ehempel pas’e sea pa un ruman mas chikito of un amigo cu si e ta sirbi. Awo, enbes di warda e sapatonan, e muchanan a saca nan sapatonan for di cashi y a pasa nan pa coleganan di un otro team.
Pa e gran sorpresa di David, den e grupo di chat tin un mayor, Ricky Nava, kende ta donjo di un compania cu a tuma un decision for di su curazon, inspira pa e hobennan y su mesun yiu su amor pa e Deporte Rey: el a laga sa cu e ta bay sponsor tur e sapatonan nobo pa e muchanan di e team.
E donacion di parti di PMAC a resulta den un tremendo beneficio pa no un, pero tres team cu tabatin mester di un poco sosten. E sapatonan nobo a bay pa e team pa cual originalmente Abdul a pidi e fabor, y e sapatonan uza, pero den bon condicion, cu tur e mayornan hunto a contribui, a bay pa dos otro team.
E entrega di e regalonan di e hungadonan di Aruba Soccer Academy, nan mayornan y PMAC a tuma luga den un ambiente festivo, unda cu a invita e hobennan pa reuni y a sorprende nan cu e sapatonan. Herbert Beeldsneijder a ricibi e sapatonan den nomber di FC San Nicolas for di PMAC.