Tin mucha cu ta soña cu score e goal perfecto, pero tin otro cu ta soña cu stop e. Bo yiu ta soña pa bira e miho keeper na Aruba?
Keepers ta haci mas cu solamente stop goals. Nan ta parti integral di e defensa di un team, y ta hopi valioso ora nan haci nan trabou bon. P’esey na Augustus ASA ta sigui cu training dedica pa keeper, bou guia di dos super keeper: coach Eric Abdul y coach Hernan Echevarria.
Coach Eric Abdul tin experiencia di keeper internacional como cu el a keep dos aña profesionalmente pa Sparta Rotterdam, y awor ta conoci como keeper di Dakota Hoofdklasse, cual a caba di sali campeon di Aruba.
Coach Hernan Echevarria ta conoci como e keeper coach di seleccion nacional y tin bon experiencia entrenando e ekipo cu ta representa Aruba.
E keepers training nan lo tuma lugar 3 biaha pa siman, y gruponan lo wordo parti pa categoria di edad. Pa categoria U9 (6-9 aña) lo tin training dialuna di 3 pa 4or na Noord, diaranson di 3:45 pa 4:45 na Piedra Plat y diabierna di 3 pa 4 na Dakota. Pa categoria U12 (10 pa 12 aña) lo tin training dialuna di 4 pa 5or na Noord, diamars di 4 pa 5or na Noord y diabierna di 4 pa 5or na Dakota. Pa categoria U16 (13 pa 16 aña) lo tin training diauna di 5 pa 6 na Noord, diamars di 5 pa 6 na Noord y diawebs di 4 pa 5or na Dakota.
Inscribi bo yiu y lag’e train manera un pro: siña distribucion di bala pa por inicia un contra atake riba e otro team: stop e bala so no ta tur cos. Nan ta siña con pa comunica efectivamente cu nan team pa traha wega y crea oportunidad, mehora agilidad y hopi otro skills mas.
Pa mas informacion por tuma contact via Whatsapp cu 592-5235 of email [email protected].