Diasabra ultimo den presencia di representante di Ministerio di Turismo, e ekipo di Aruba Airport Authority, Aruba Tourism Authority, y AHATA Aruba a ricibi e prome buelo di Wingo procedente di Bogota, Colombia. Wingo ta un aerolinea nobo riba e mercado di Colombia y cu su ruta pa Aruba ta haci e di 29 aerolinea cu Aruba ta yama bon bini. Aruba ta un di e 12 rutanan di Wingo cu lo sali for di Bogota, y parti di e 3 cu ta wordo introduci pa e region di Caribe. Wingo lo ta bulando 2 biaha pa siman pa Aruba.
Jurgen Benschop, COO di Aruba Airport Authority a hiba palabra yamando e aerolina nobo aki bon bini na nos isla y a elabora riba e hecho cu e mercado Colombiano ta uno cu hopi pontencial pa Aruba, mas ainda awo cu e visa a wordo elimina.
CEO di Aruba Tourism Authority, Ronella Tjin Asjoe-Croes, tambe a hiba palabra di felicitacion y a yama e ekipo di Wingo bon bini riba nos isla. A elabora riba e importancia di e mercado Colombiano pa Aruba y con Wingo lo ta un socio importante den yuda sigui posiciona Aruba como e isla favorito di e Colombianonan, esaki ta porsierto resultado di encuesta haci door di despegar.com e aña aki.
Durante e prome dies lunanan di 2016 a nota un crecemento di 39% den e fluho di bishitante Colombiano y meta ta pa sigui crece e mercado aki den 2017 cu un minimo di 25%. Ronella Tjin Asjoe-Croes a splica con Wingo su strategia lo ta uno cu por yuda cu esaki.
Representante di Wingo, Carolina Gomez, tambe a hiba palabra y a gradici pa e cooperación ricibi te cu awor. Riba e vuelo inaugural a biaha Directora di ATA. pa Latino America, Miriam Dabian.