Aruba presente na conferencia en conexion cu derecho di mucha na Corsou

0

Un delegacion consistiendo di 28 persona di diferente organisacion gubernamental y no-gubernamental di Aruba, encabesa pa Minister di Asunto Social y Labor, Sr. Glenbert Croes, ta actualmente presente na Corsou pa un conferencia di dos dia tocante criansa y participacion di mucha, esaki en conexion cu derecho di mucha.
E conferencia a wordo organisa door di e taskforce di reino cu ta traha riba e topico di derecho di mucha den reino Hulandes. Durante e dos dianan aki tur isla a traha y lo sigui traha riba nan plan di accion pa loke ta trata e implementacion di un vision pedagogico dirigi riba kico muchanan mester di nan mayor/ educadornan pa por desaroya na nan maximo potencial.
E prome dia ta tras di lomba y riba e dia aki e ‘opvoed Ambassadeur’ (Embahador pa criansa/educacion) di Aruba, sra. drs. Yvonne Geerman-Bermudes a presenta con leu Aruba ta riba e tereno aki. Tur pais a comparti un ‘best practice’ cu e participantenan den un carrousel di informacion.
Tambe riba e prome dia Srta. Thixiane Wever lider di e proyecto ‘feria social’ di CEDE Aruba, a haci un presentacion di e exitoso proyecto aki cu tin tres aña ta stimula participacion di hobennan riba tereno social den cooperacion cu companianan di sector priva. Na mes momento cu e profesionalnan ta intercambia den e carrousel, e mandatarionan di tur Pais tabata den dialogo riba e mesun topico pa asina stimula cooperacion entre e paisnan den reino Hulandes.
Riba e di dos dia lo caba di defini e direccion cu Aruba mester bay pa asina stimula participacion y crea un hogar yena cu amor y stabilidad cu por brinda e mucha structura y disciplina pa asina e por ta e miho cu e por ta.
Minister di Asunto Social y Labor, Sr. Glenbert Croes y tur miembro cu ta forma parti di e delegacion presente na Corsou tin un compromiso cu e bienestar di tur muchanan na Aruba.

Comments

comments