Riba 10 Mei ultimo, durante un sesion di e Conseho di Derecho Humano di Nacionnan Uni na Geneve, Reino Hulandes a wordo evalua riba e tereno di Derecho Humano.
Cada Estado miembro di Nacionnan Uni ta wordo someti na un evaluacion cada 4 aña. E asina yama Universal Periodic Review (UPR) ta un instrumento general y politico cu Nacionnan Uni ta dispone di dje pa supervisa e cumplimento y e progresonan realisa den e paisnan miembro riba tereno di Derecho Humano.
Un delegacion di Aruba tabata presente na Palais des Nations na Geneve, formando parti di e delegacion di Reino Hulandes, encabeza pa Minister Plasterk di Asuntonan Interior y di Relacionnan di Reino. E delegacion di Aruba tabata consisti di Minister Plenipotenciario na Den Haag, Sr. Juan David Yrausquin y Sra. mr. Olivia Croes di Departamento di Relacionnan Exterior.
E sesion aki tabata basa riba un rapport di Reino entrega na Nacionnan Uni na comienso di 2017, y tambe riba recomendacionan haci door di e Comitenan International durante tratamento di e varios Tratadonan di Derecho Humano na vigor pa Aruba.
Durante e session, 97 pais a haci un intervencion, dunando sea nan elogio, punto di bista of recomendacion pa mehoracion den e implementacion di Derechonan Humano den e paisnan di Reino Hulandes. Proteccion y cumplimento di Derecho Humano ta un proceso continuo cu tin su retonan y Gobierno di Aruba ta habri pa e recomendacionnan di otro paisnan miembro pa mehora su cumplimento.