Aruba preparando pa duna homenahe na Rudy Plaate y Norman Moron

0

Pa esnan cu ainda no conoce e musica di Rudy Plaate, mi ta sugeri nan subi YouTube y scucha algun piesa di dje. Cualkier di nan, pasobra tur ta bunita. Hopi ta scoge Atardi como e obra maestro di Rudy Plaate, pero ta un escogencia dificil, pasobra e canticanan Tog mi sa, Dugudugu sin sous, Ma yega lat y hopi otro ta expresa sentimentonan di nos di e region Caribense Hulandes cu Rudy Plaate a capta musicalmente.
Rudy a compone mas di 400 cantica y jingle pa diferente producto y servicio, tur na Papiamento, su idioma stima cu semper el a uza pa canta tambe. Entre su canticanan tin tambe pa mucha y pa misa. Su canticanan, di amor pa prohimo y pa su pais, ta hopi gusta pa hendenan di tur edad y ta wordo canta frecuentemente den reunionnan social y den paranda. Algo interesante di Rudy cu mayoria di hende no conoce ta cu Rudy a traha cantica pa misal di pueblo di Corsou y el a yuda e soeurnan na Aruba tambe cu cantica pa misa.
Recientemente, Michael Kuiperi y Netto Arends, bon amigo y ferviente fanatico di e musica di Rudy y Norman a dicidi di organisa un concierto pa duna homenahe na e compositor y e  pianista. Cu ayudo grandi di Percy Jeand’or ya e plannan ta asina avansa cu por menciona algo di e evento.
E atraccion special indudablemente ta e actuacion di Norman Moron. Loke Rudy Plaate capta musicalmente, Norman Moron ta refleha exkisitamente cu e teclanan di su piano. Den mundo di farandula, tin nombernan cu a pega na otro pa semper: Bud Abbott y Lou Costello, comiconan di pelicula; Lerner and Lowe, e team super exitoso di letrista y compositor cu a traha cantidad di pelicula y show di Broadway manera Camelot, Gigi, My Fair Lady y hopi mas. E cantantenan Dhaddy Brokke y Tony Sherman tabata masha popular un tempo, pero e nombernan Rudy Plaate y Norman Moron ta sigui inseparabel. Rudy Plaate, letrista y compositor, y Norman Moron, pianista, tur dos CurazoleÒo di nacimento, probablemente ta e team di musico mas conoci, admira y stima, no solamente na nan isla natal, pero tambe aki na Aruba, Boneiro y Hulanda.
Artista y gruponan cu a confirma cu nan lo participa: Rachel Kraaivanger, Frank Croes y su amigonan guitarista, Robert Thiel y su amigonan, Papito Rafael ñ Biba Lekkerband, e inimitabel Etty Toppenberg y Maybelline Arends-Croes cu su coro mixto. Tin un chens grandi cu mas musico lo confirma participacion dentro di poco.
E concierto lo tuma luga na Renaissance Convention Center dia 8 di October cuminsando 8or pm.
Marca e fecha riba bo calender! Entrada lo ta apenas $20 of Afls 35.00. Ticketnan lo ta obtenibel na Cas di Cultura (Sra. Joan Hart), Boekhandel van Dorp, Antraco y Djispiís Place. Tur ganashi lo bay pa un organisacion cu ta yuda desaroya hobennan Arubiano musicalmente.
Michael y Netto ta gradici  tur cu a yuda haci e conciero posibel. Ta nan deseo cu e concierto aki lo ta un comienso di conciertonan di homenahe na tur e musiconan di nos region Caribense Hulandes cu merece homenahe. Por contacta Michael na michaelskuiperi@gmail.com,  Netto na
nettoarends@yahoo.com.