Di 14 pa 17 di Juni proximo nos isla lo ta anfitrion di un grupo masha importante di ehecutivonan di sector di turismo crucero. E Platinum Associate Member Advisory Council Conference (PAMAC) di Florida-Caribbean Cruise Association (F-CCA) ta un evento cu Aruba Tourism Authority ta wak como un oportunidad excelente pa ilustra e avancenan cu Aruba a conoce. Hunto cu socionan local, A.T.A. a prepara un programa caminda lo brinda e participantenan di e conferencia e experiencia cu nos por ofrece como destino turistico na pasaheronan crucero.
Mario Arends, Cruise Manager di Aruba Tourism Authority a splica e relevancia di e conferencia PAMAC pa futuro di nos turismo: “Esaki ta un oportunidad pa showcase Aruba su progreso como cu esaki ta e ‘decision makers’ pa loke ta e industria di crucero y nan por tuma e decision di inclui of no inclui un destino. Nos sa cu tin hopi plannan pendiente pa desaroyo di puerto na Oranjestad pa loke ta cruceronan; nos kier mustra cu Aruba ta sigui desaroya y ‘step up’ y nos ta cla pa ricibi nan pasahero y naturalmente e barconan.” Esaki, segun Arends, ta parti di e trabou di sigui posiciona Aruba como un destino hopi preferencial y hopi gusta di parti di turistanan crucero.
Otro siman un total di 83 miembro platinum di F-CCA, 11 empleado di F-CCA y 47 invitado lo yega Aruba pa e conferencia. Adicional na sesionnan di trabou cu stakeholders local y presentacionnan di parti di A.T.A., e participantenan di e conferencia tambe lo tin chens di conoce nos isla y su encantonan pa medio di tours den Parke Nacional Arikok, den e area di centro di nos ciudad incluyendo Caya G.F. Betico Croes, y pa medio di actividadnan acuatico y tour na museonan. Asina e participantenan por haya un smaak di nos cultura tambe.
Recientemente e presidente di F-CCA, Michelle Paige a papia di e interes cu su miembronan tin den Aruba: “Den e estudio di impacto economico cu F-CCA a haci na 2015, Aruba consistentemente a alcansa e top 5 entre e 35 destinacion den termino di satisfaccion. Aruba y e industria crucero tin un sociedad tremendo dor di tur e cosnan cu Aruba a percura p’e pa sigura cu Aruba ta na cabes di ofrece un experiencia satisfactorio na e pasaheronan crucero. E conferencia ta sirbi pa bin traha hunto y experiencia Aruba pa nan mes y asina, un biaha mas, haya e primicia di tur e cosnan nobo y emocionante cu Aruba ta haciendo.”
PAMAC ta un evento cu F-CCA ta coordina pa su miembronan platinum y liñanan crucero keda na ‘forefront’ di informacion riba tanto e industria y su miembronan, como tambe destinacionnan, mientras cu ta haya maneranan pa maximalisa e beneficionan pa tur. F-CCA ta un organisacion comercial no lucrativo cu ta consisti di 19 miembro di liñanan crucero operando riba mas cu 100 barco den e awanan di lama di Florida, Caribe y Latinoamerica.