E dianan 28 di April te cu 1 di Mei proximo, un delegacion den e deporte di Tang Soo Do lo ta na Heredia, Costa Rica unda nan lo ta participando na e torneo XIX Internacional Costa Rica 2017 den e Region 18 Centro Americano y Caribe. Paisnan confirma cu lo participa na e torneo aki ta Puerto Rico, Panama, Nicaragua, Costa Rica y Aruba. E atletanan di Aruba cu lo competi na e torneo aki ta Gilbert Geerman black belt 1ste Dan, Marliviënne Lampe black belt 1ste Dan y Cory Aragon, Cho Dan Bo. Tur tres ta miembro di e scol Gihae Tang Soo Do Studio. Nan lo wordo guia pa nan entrenador, Sah Dan Master Melissa Noguera.
Mester bisa cu e atletanan ta forma parti di e seleccion di Aruba y aña pasa den e Campeonato Mundial di World Tang Soo Do na North Carolina nan a sobresali mientras na Aruba mes cada un ta destaca den e diferente campeonatonan organisa logrando mayoria premio. Durante di e torneo na Costa Rica, nos atletanan lo competi den e Open Hand Forms( forma liber), weapon forms( forma cu arma) y sparring (pelea)
Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di Aruba Tang Soo Do Federation pe torneo internacional di Tang Soo Do na Heredia, Costa Rica
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.