Segun sra Arends-Reyes un di e tareanan di Parlamento ta pa yuda pensa y bin cu proposicionnan pa mehoracion di maneho of tin biaha pa trece cambionan den ley existente cu ta rekiri di esaki despues di tempo. Un di e topiconan cu a bin dilanti durante tratamento di presupuesto 2016 ta nos hubentud y con nos lo por logra disminui e cantidad di ‘drop-outs’ cu nos isla conoce. E ley di Enseñansa obligatorio ya ta existi pa varios aña y ta un di e leynan mas importante pa cu hobennan cu a ser introduci na Aruba, cu por cierto tambe tabata un recomendacion di Unicef. Na e momentonan aki e ley ta toca hobennan te cu 16 aña. Pero si wak den region y na Hulanda e adaptacion di e ley aki ta cosechando su frutonan. Pa disminui entre otro fenomeno di ‘drop-outs’ a introduci e kwalificatie plicht despues di 16 aña te cu 18 aña. Ki nan ta promove un diploma di MBO2, Havo of Vwo pa nos hobennan sigui studia sea part-time of full time. Hobennan special of cu un otro limitacion conoce exoneracion pa cu e nivel di Enseñansa aki. Den un mocion presenta pa Sra Arends-Reyes a urgi Gobierno pa sondea e posibilidad pa bay den e siguiente paso despues di Enseñansa obligatorio y awor durante tratamento di presupuesto 2017 sra Arends-Reyes a bolbe trece e topico aki dilanti. Si Aruba logra bin cu e adaptacion aki den e ley e lo por trece hopi beneficio pa nos hobennan y stimula Enseñansa cu un cualificacion. Aruba lo por beneficia cu tempo di un comunidad mihor prepara pa futuro y cu mihor mobilidad social dor di fomenta un cultura pa hobennan no drenta mercado laboral sin un cualificacion. E mocion aki a carga aprobacion unanime di Parlamento di Aruba y ta spera cu pronto lo tende e resultadonan di e proposicion aki.