Un bes mas un otro delegacion den e deportedi ahedres lo biaha pa un torneo internacional den exterior. E ahedristanan Octavio Croes y Brian Diaz lo representa Aruba den e asina yama Campeonato Continental Absoluto de las Americas y lo tuma lugar na e ciudad di Medellin, Colombia. Diabirrna awor e dos atletanan di Aruba lo sali pa Medellin. Esaki lo ta e di 12 edicion di Campeonato Continental Absoluto de las Americas. Ambos atleta di Aruba a gana e derecho pa representa Aruba na e Campeonato Continental aki, segun nan formidabel prestacion e ultimo periodo na Aruba.
Remarcabel ta cu e torneo di ahedres na Medellin ta esun di mas grandi di e continente America unda paisnan grandi lo participa manera Canada, USA, Venezuela, Colombia, Cuba, Peru, Argentina, Brasil y Chile. Mester bisa cu ta ser spera un total di 190 participante cu lo bataya fuerte contra di otro den e campeonato aki. E torneo lo consisti di 9 rond unda e prome rond lo inicia diasabra awor mientras su siguiente siman dia 18 di juni e lo termina cu e ultimo rond y e entrega di premionan. Pa tur interesado por sigui e resultadonan di Octavio y Brian riba e website; http://chess-results.com/tnr279371.aspx
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e delegacion di ahedres pa e Campeonato Continental Absoluto de las Americas na e ciudad di Medellin, Colombia..
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.