Directiva di Aruba Karate Bond ta informa tur su miembronan y publico en general cu tur e testnan (tryouts) pa e karatekanan solicitando pa forma parti di e team di seleccion 2018 a keda cla.
Despues di un temporada di preparacion -incluyendo e ronda di solicitud di e coachnan local y internacional- Aruba Karate Bond a yega na su escogencia di un ekipo di coach kende a keda den persona di Sensei Anthony Geerman (headcoach) y Sensei Alberto Gonzalez Lujan (assistantcoach).
Tabata tin basta preparacion y e testnan di e karatekanan solicitando pa drenta seleccion a tuma luga riba dos diasabra sigui tras di otro. E prome test a tuma luga riba diasabra 2 di juni y e segundo test a tuma luga riba diasabra 9 di juni ultimo. Ambos diasabra mainta a cuminsa cu un bon calentamento (‘warming up’). Despues di esaki, a pasa pa e diferente testnan den cual a midi varios componente importante manera e flexibilidad, rapidez y forsa di cada karateka. Impresionante tabata pa wak cu tur karateka presente a duna lo maximo di nan mes. Dentro di poco AKB lo avisa tur ‘sensei’ di e scolnan di karate (miembro di AKB) cua karatekanan a keda eligi. Tambe AKB lo reuni cu e instructornan y e mayornan riba termino corto pa duna informacion di e schedule di training.
Directiva di AKB, bou liderazgo di sensei Felix Tromp, ta gradici tur sensei, mayor, karateka y boluntario cu a yuda na e ronda di testnan. Un gradicimento special ta bay pa Guillermo Prospero Trinidad y Centro Deportivo Franklin Bareño cu a permiti AKB haci uzo di nan facilidadnan. Pa informacion por comunica cu AKB na [email protected] .