Diadomigo awor 6 di November, e federacion di Karate lo organisa un dia di combate pa tur su scolnan di karate den e Centro Deportivo Betico Croes na Sta Cruz. E evento lo wordo organisa en conexion cu e ASU Olimpiada 2016. Pa 9or di mainta esaki lo inicia mientras e lo dura te den oranan di atardi. Sigur lo por disfruta di e numeroso combatenan den e diferente categorianan tanto den e nobatonan como tambe esunnan mas avansa den color di faha.
E deporte di karate ta den pleno desaroyo na Aruba. Ya pa algun aña e deporte ta bin ta creciendo den forma rapido y cu varios scolnan nobo. Mirando e popularidad di e deporte di karate bou di nos hobennan Aruba a conoce varios Dojo unda nos muchanan por praktica e deporte di arte martial. Pa menciona algun nos tin Dojo Gyoseki Kan Tamashi Aruba, Dojo Shoshinkai Shotokan Karate Do, Karate-Do Ryubo-Kai, Dojo Shibumi, Dojo Shocokan y Dojo Budokan. Aruba Karate Bond ta trahando duro na bienestar di nan atletanan y ta purba di organisa competencianan riba un base regular. Mas cu claro nos atletanan di karate ta explora nan desaroyo y conocimento door di participa na competencianan internacional den nos region y continente y mayoria biaha cu exito logrando medaya.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di karate Open Aruba National Karate Championship en conexion cu e ASU Olimpiada 2016.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.