Diabierna 25 di Mei a tuma luga e apertura oficial di Aruba Experience Cafe – Patisserie, un luga cu ta desea di rescata y preserva e herencia cultural di Aruba den e curason di e prome area comercial cu a existi riba nos dushi isla. Situa na Rancho, den un cas cu mas di 150 aña di historia, bo por disfruta di un variedad di pan fresco artesanal, pan dushi, bolo y diferente otro producto di pasteleria.
E acto di apertura a consisti di varios punto cuminsando cu e palabranan di bonbini na e evento, na encargo di Mark Benson-Denz, sigui pa un potpurri di diferente baile tipico presenta pa e grupo di baile Youth Expressions; despues di e baile a tuma luga e speech di e propietaria Susan Ruiter, cu a comparti cu tur esunnan presente e vision di Aruba Experience Cafe – Patisserie y con el a yega na bira un realidad.
Durante e anochi tabatin diferente momentonan emotivo, entre nan ora cu nos tata di cultura Padu Lampe a acerca podium y Susan a pidi’e pa su bendicion pa cu e proyecto. Su excelencia Minister President Sra. Evelyn Wever-Croes y Minister Armando Lampe tambe tabata presente. Grupo di Betico hunto cu Caha di Orgel di Martin Farro y Grupo di Dande di Igmar Maduro, combina cu musica di Steelpan en bibo, a anima e anochi aki.
Na Aruba Experience Cafe – Patisserie bo por scoge bo koffie faborito, traha cu granonan di diferente parti di mundo y di calidad excelso, prepara pa un barista profesional. Su propietaria, Susan Ruiter -originalmente di Venezuela- kier comparti cu e turistanan y yiu di tera, e amor y e sentido di gratitud cu e ta sinti pa cu e pida baranca aki. E cafe a nace di e inspiracion di progreso cu Susan a experimenta for di tempo cu el a bin biba na Aruba ora cu el a presencia e combersacion entre un dama di Aruba y varios persona di diferente otro nacionalidad. Susan a admira e facilidad pa cambia di idioma, e conocemento general di actualidad mundial cu e señora a mustra y esaki a dun’e un vision di loke e mes kier a persigui durante su bida.
Awo, 17 aña despues di su yegada na Aruba y cu un sinfin di experiencianan diverso, Aruba Experience Cafe – Patisserie ta e suma di loke Susan a absorbe di nos cultura y cu awo e kier comparti cu tur su bishitantenan –Un experiencia pa cada un di nos cinco sentidonan.