Diaranson siman pasa pa ta mas exacto dia 23 di november 2016 un delegacion consisitiendo di 28 landador di e equipo di natacion Aruba Dolphins a sali pa Sto. Domingo, Republica Dominicana pa participa den e di XXXIV Torneo Internacional di natacion organisa pa Delfines del NACO.
E landadornan di Aruba Dolphins a bataya fuerte contra e mas cu 500 landadornan di 43 equipo representando 10 diferente paisnan di Caribe y Ustados Unidos den e Pisina di Complejo Acuatico Centro Olimpico Juan Pablo Duarte.
E landadornan di Aruba Dolphins a duna un tremendo bataya y ta logra no menos cu 32 medailla individual di cual 11 di oro, 10 di plata y 11 di brons y ta logra tambe varios puesto di honor.
Den categoria femenino 11-12 aña Amy Pichardo ta logra tercer puesto den ‘High Point Trophy’ cu 41 punto.
Den categoria femenino 13-14 aña Elisabeth Timmer ta logra segundo puesto den ‘High Point Trophy’ cu 56 punto.
Den categoria femenino 15-17 aña Flory Kock ta logra prome puesto den ‘High Point Trophy’ cu 76 punto.
Na final di e campeonato Aruba Dolphins ta logra e tercer puesto den e standing di equiponan cu 437.5 punto.
Na segundo lugar a termina e equipo Delfines del Naco cu 651.5 y e equipo Marlins de Arroyo Hondo a termina na prome lugar cu 724 punto.
Esnan cu a kibra un Meet record ta:
• Elisabeth Timmer den 50m Free cual ta un record cu ta data di aña 2003. E record tabata 27.96 y awor ta 27.67.
• Flory Kock den 100m Free ta kibra e meet record cu ta data di aña 2013 cu tabata 59.76 y awor ta 59.50.
Directiva di Aruba Dolphins Swimming & Waterpolo Club kier a felicita e seleccion cu e presentacion aki y tambe kier a gradici un y tur cu a juda hasi e viaje aki posibel.
Pa mas info riba resultadonan y di e team bishita www.arubadolphins.com