Diabierna, S.E. Gobernador di Aruba, Sr. Alfonso Boekhoudt a haci apertura oficial di e proyecto Aruba Doet, na Centro Kibrahacha. Esaki ta un celebracion di aplaudi, segun S.E. Alfonso Boekhoudt.
Esaki ta un proyecto cu ta di aplaudi, ya cu den e forma aki e proyecto ta wordo brinda na gran parti di nos comunidad, pa asina nos siña keda duna. Pa Sr. Gobernador Aruba Doet ta un simbolo di no cansa di haci bon. Aruba Doet ta pone tur hende den e posicion tur aña di nobo pa haci bon pa otro. “Nos proposito den bida ta pa ta feliz, pero ora nos duna di nos mes, nos ta feliz. Ora bo ta duna di bo mes tambe, ya caba tin hopi pruebanan haci, cu ora cu bo ta duna y bo ta haci bon, bo ta biba mas largo tambe”.
Sociedad di Aruba ta un tiki desconecta y mester conecta bek cu otro. Esaki ta un di e proyectonan cu ta conecta Aruba den un forma hopi grandi mes. Sr. Gobernador ta contento cu tur hende ta mira e esencia pa participa ya cu asina aki ta conecta cu otro.
Esaki ta algo cu nos mester keda enfoca ariba dje. Tur aña ora cu ta haci bon, wak e cara di e hende cu bo ta haci bon pe. Wak su cara, segun Sr. Gobernador. Wak con agradecido e persona ta bira.
Aruba su turismo, su pilar economico, ta basa ariba nos cualidadnan como Arubiano, un ser hopi amabel. E proyecto di Aruba Doet ta yuda nos expresa esaki.
Por ultimo S.E. Gobernador di Aruba, a gradici un y tur di e boluntarionan cu a bini hunto pa e causa y pa nan aporte na e comunidad di Aruba, cu sigur lo sigui participa den e añanan cu ta bin.