Aruba di Dammen lo competi den torneo Pan Americano Senior di Dam

0

Henter e siman aki lo tuma luga na nos isla ruman Corsou, e di 20 edicion di e campeonato Senior Panamericano di Dammen 2018 esaki riba invitacion di Pan- American Draughts & Checkers Confederation. E weganan mes a start sali diasabra mientras esakinan lo dura te cu diasabra awor dia 9 di Juni. E torneo lo sirbi como un clasificacion pa e campeonato mundial di dam cu lo tuma lugar otro aña na Rusia. Na e campeonato na Corsou, dos hungado femenino a haya e oportunidad pa bay competi.

Mas cu claro, Club di Dam Arowak a manda un delegacion fuerte pa competi contra e mihonan den nos region y continente. E biaha aki por a manda dos atleta masculino y un atleta femenino, e ultimo lo haya e oportunidad pa competi den e Woman’s World Championship 2019.

E delegacion di Aruba ta consisti di e hungador femenino cu ta Annelaine Jacobs cu ta hasi su regreso bek den e deporte di dammen. Mester bisa cu varios aña atras e atleta Annelaine Jacobs a conkista e titulo Panamericano di dam den e categoria infantil. Tambe nos tin e atletanan masculino kendenan ta Henry Knepa y Juan Nisbet. Henry Knepa ta e actual campeon di Aruba den e deporte di dammen. Un palabra di exito na henter e delegacion di Aruba den e campeonato Pan-Americano di dammen na Corsow.

Stichting Sportsubsidie Aruba tambe a yuda subsidia e biahe di e delegacion di dammen pa e campeonato Pan-Americano di dammen na Corsou.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.

Comments

comments